کراچی: جناح سندھ میڈیکل یونیورسٹی نے اپنے سالانہ دو روزہ گریجویٹ پروگرامز کے جائزے کا کامیاب انعقاد کیا۔ اس جائزے کا مقصد اپنے پوسٹ گریجویٹ پروگرامز کے معیار اور کارکردگی کا جائزہ لینا تھا، جو ہائر ایجوکیشن کمیشن آف پاکستان کے طے شدہ معیار کے مطابق تھا۔
اس جائزے کے عمل میں تین اہم پہلوؤں پر توجہ دی گئی۔ سب سے پہلے، دستاویزی جائزہ لیا گیا تاکہ پوسٹ گریجویٹ پروگرامز سے متعلق ریکارڈز اور رپورٹس کا معائنہ کیا جاسکے۔ دوسرے مرحلے میں، مختلف ایم ایس، ایم فل، مساوی اور پی ایچ ڈی پروگرامز کے تحقیقی اسکالرز، اساتذہ، ڈینز اور پروگرام کے سربراہان سے تجاویز حاصل کی گئیں۔ تیسرے مرحلے میں، یونیورسٹی کے انفراسٹرکچر اور معاون نظام کا جائزہ لیا گیا۔
جائزہ کے لیے آنے والے ما ہرین کے وفد میں، سلیم حبیب یونیورسٹی سے سید وقارالحسن، سہیل یونیورسٹی سے ڈاکٹر عرشیہ نقوی، ڈاؤ یونیورسٹی آف ہیلتھ سائنسز سے پروفیسر ڈاکٹر فرحان سعید وکانی، اور ہمدرد یونیورسٹی سے پروفیسر ڈاکٹر ندیم کھوکر شامل تھے۔
افتتاحی اجلاس کے دوران ڈائریکٹر کیو ای سی ڈاکٹر عبد الواحد عثمانی نے جائزے کی اہمیت اور دائرہ کار پر روشنی ڈالی۔ ڈاکٹر ثریا نے یونیورسٹی کی گورننس اسٹرکچر اور کارکردگی کے پیمانوں کے حوالے سے ایک جامع تعارفی پریزنٹیشن دی۔ بیرونی جائزہ لینے والوں نے جائزے کے عمل کے دوران عملے کے تعاون اور معاونت کی تعریف کی، اور ان کی خدمات کے اعتراف میں ان کو یادگاری شیلڈز پیش کی گئیں۔
تقریب کا اختتام جناح سندھ میڈیکل یونیورسٹی کے رجسٹرار ڈاکٹر اعظم خان کے شکریہ کے کلمات کے ساتھ ہوا۔
