ترکی کی تعاون اور رابطہ ایجنسی ٹیکا، انسانی امداد کی بین الاقوامی ترک تنظیم آئی ایچ ایچ کے ساتھ مل کر، ایمرجنسی اور ڈیزاسٹر ریسپانس ٹریننگ پروگرام (ADAMEP) کے تحت پاکستان میں اپنے ڈیزاسٹر ریسپانس سے متعلق سرگرمیاں جاری رکھے ہوئے ہے۔
اس پروگرام کے تحت کراچی میٹروپولیٹن کارپوریشن (KMC) اربن سرچ اینڈ ریسکیو (USAR) ٹریننگ سینٹر میں ایک ہفتہ طویل ایڈوانسڈ اربن سرچ اینڈ ریسکیو (USAR) ٹریننگ کا انعقاد کیا گیا۔ تربیت میں سندھ اسکاؤٹس ایسوسی ایشن اور الخدمت فاؤنڈیشن کے 30 سرچ اینڈ ریسکیو رضاکاروں نے شرکت کی، جس کا اختتام اسناد تقسیم کرنے کی تقریب پر ہوا۔
اختتامی تقریب میں معززین کی نمایاں تعداد نے شرکت کی جس میں سابق سندھ محتسب اعزاز علی خان، ٹیکا کراچی کے سربراہ خلیل ابراہیم بشاران، سندھ کے ڈائریکٹر جنرل کالجز ڈاکٹر نوید رب صدیقی، سندھ اسکاؤٹس کے صوبائی سیکریٹری سید اختر میر، آئی ایچ ایچ ڈیزاسٹر مینجمنٹ ٹرینرز اور کراچی سرچ کارپوریشن کی ریسکیو ٹیم کے اراکین کے علاوہ دیگر مہمان گرامی بھی شامل تھے۔
تقریب سے خطاب کرتے ہوئے سندھ کے سابق محتسب اعزاز علی خان نے تربیتی پروگرام کی اہمیت پر روشنی ڈالی اور کہا کہ سندھ، ایک آفت زدہ صوبے کے طور پر، ٹیکا کی کوششوں سے نمایاں طور پر مستفید ہو رہا ہے۔ انہوں نے تربیتی پروگراموں اور ضروری سازوسامان کی فراہمی دونوں کے ذریعے پاکستان میں آفات سے نمٹنے کے لیے تعاون کرنے پر ٹیکا کا تہہ دل سے شکریہ ادا کیا۔
اپنے خطاب میں ٹیکا کراچی کے سربراہ، خلیل ابراہیم بشاران نے اس بات پر زور دیا کہ یہ تربیتی سفر، جو پاکستان کے تباہ کن سیلاب اور ترکی میں آنے والے زلزلوں کے بعد شروع ہوا تھا، تاحال جاری ہے۔ انہوں نے اس امر کو اجاگر کیا کہ اس پروگرام نے گہری شراکت داری اور مشترکہ امنگوں کو فروغ دیا ہے اور اس کاوش کے اختتام پر ٹیکا کا وژن یہ ہے کہ وہ پاکستان میں ایک انتہائی قابل سرچ اور ریسکیو ٹیم اور ایک مخصوص تربیتی مرکز چھوڑے، جو ممکنہ آفات کا سامنا کرنے کے لیے مسلسل تیاری کی راہ ہموار کرے۔
تربیتی پروگرام کی شریک اسکاؤٹ ٹیم لیڈر توحید فاطمہ نے حاضرین کے ساتھ اپنے تجربات شیئر کرتے ہوئے کہا کہ یہ پروگرام بےحد مفید ثابت ہوا۔ انہوں نےبتایا کہ اس تربیت نے ٹیم ورک، تیاری، ثابت قدمی اور عزم کا درس دیا۔ فاطمہ نے اس موقع کی فراہمی پر ٹیکا اور مستقل حمایت اور خدمات پر آئی ایچ ایچ ڈیزاسٹر مینجمنٹ ٹرینرزکا تہہ دل سے شکریہ ادا کیا۔
تقاریر کے بعد سندھ اسکاؤٹس ایسوسی ایشن اور الخدمت فاؤنڈیشن کے 30 سرچ اینڈ ریسکیو رضاکاروں کو ان کی تربیت کی کامیاب تکمیل پر اسناد پیش کی گئیں۔
