کراچی (02 مارچ 2025) پاکستان پیپلز پارٹی سندھ کے جنرل سیکریٹری اور وزیر اعلیٰ سندھ کے معاون خصوصی برائے چیف منسٹر انسپیکشن ٹیم سینیٹر وقار مہدی نے کہا ہے کہ سوئی سدرن گیس کمپنی رمضان المبارک میں سحر اور افطار کے لیے سوئی گیس کی سپلائی کے اپنے جاری کردہ شیڈول پر عملدرآمد میں پہلے روزے ہی ناکام ہو گئی ہے، سندھ کے مختلف اضلاع بلخصوص کراچی کے بیشمار علاقوں سے گیس کی عدم فراہمی اور کم پریشر کی شکایات موصول ہوئی ہیں۔ اپنے جاری کردہ بیان میں، سینیٹر وقار مہدی نے کہا کہ سوئی سدرن گیس کمپنی کی غفلت کے باعث شہریوں کو سحری اور افطاری کی تیاری میں شدید مشکلات کا سامنا کرنا پڑا ہے اور شہریوں کو بازار سے مہنگے داموں سحری اور افطاری کے لیئے ضروری اشیاء خردونوش خریدنی پڑیں ہیں ۔ انہوں کہا کہ صوبہ سندھ %71 سوئی گیس پیدا کرتا ہے لیکن سندھ کے عوام اپنے صوبے میں پیدا ہونے والی نعمت سے محروم ہیں، اور اسکی صرف اور صرف ذمیدار وفاقی وزارت پٹرولیم اور قدرتی وسائل اور سوئی سدرن گیس کمپنی کی انتظامیہ ہے۔ انہوں نے کہا کہ جب سوئی گیس انتظامیہ کے دیئے گئے شکایتی سیل کے نمبر پر شہری کم پریشر اور گیس کی عدم فراہمی کی شکایت درج کراتے ہیں تو کوئی سنوائی نہیں ہوتی ہے، سوئی گیس انتظامیہ کی نااہلی اور غفلت کے باعث شہری سخت اذیت کا شکار ہیں اور بلخصوص خواتین کو امور خانہ داری میں شدید مشکلات اور دقت کا سامنا ہے۔ وقار مہدی نے وزیراعظم سے مطالبہ کیا کہ وہ سندھ کے شہریوں کے گھروں میں گیس کی عدم فراہمی اور گیس کے کم پریشر کی صورتحال کا نوٹس لیں اور اپنے وفاقی وزیر کو پابند کریں کہ وہ سندھ میں گیس کی مسلسل اور بہتر فراہمی کو یقینی بنائیں اور عوام کو اس اذیت سے نجات دلائیں اور سوئی سدرن گیس کمپنی کو متنبہ کریں کہ وہ اپنا قبلہ درست کریں اور اپنا ذمہ دارانہ کردار ادا کریں۔
