آج ہم نے اپنے وعدے کے مطابق سولر ہوم سسٹم کی تقسیم کو یقینی بنایا ہے

کراچی/ حیدرآباد یکم مارچ ۔محکمہ توانائی حکومت سندھ کی جانب سے سندھ سولر انرجی پروجیکٹ کے تحت سولر ہوم سسٹم کی تقسیم کے حوالے سے ایک تقریب منعقد کی گئی۔ پہلے مرحلے میں ٹنڈو جام تعلقہ دیہی حیدرآباد کے 100 مستحق افراد میں بینظیر بھٹو انکم سپورٹ پروگرام کے تحت سولر ہوم سسٹم تقسیم کیے گئے۔ اس تقریب میں سندھ کے سینئر وزیر شرجیل انعام میمن اور صوبائی وزیر توانائی سید ناصر حسین شاہ نے شرکت کی۔ اس موقع پر کمشنر حیدرآباد بلال احمد میمن، ڈپٹی کمشنر زین العابدین میمن، ڈپٹی میئر حیدرآباد صغیر احمد قریشی، چیئرمین ٹی ایم سی حسین آباد عمیر مولا بخش چانڈیو سمیت دیگر معززین بھی موجود تھے۔ اس موقع پر شرجیل انعام میمن نے سید ناصر حسین شاہ کو ان کی کوششوں پر مبارکباد پیش کرتے ہوئے کہا کہ آج ہم نے اپنے وعدے کے مطابق سولر ہوم سسٹم کی تقسیم کو یقینی بنایا ہے۔ انہوں نے مزید کہا کہ سندھ میں پہلے بھی سکھر اور شہید بینظیر آباد میں یہ پروگرام منعقد کیے جا چکے ہیں، جس کے تحت دولاکھ گھروں کو سولر سسٹم فراہم کئے جا رہے ہیں

اور دوسرے مرحلے میں سندھ کے مزید ڈھائی لاکھ گھروں کوجون 2025 سے پہلے یہ سولر سسٹم فراہم کئے جائیں گے۔ شرجیل انعام میمن نے کہا کہ بلاول بھٹو زرداری بغیر کسی عہدے کے عوامی خدمت کر رہے ہیں، جو ثابت کرتا ہے کہ وہ ملک کے وزیراعظم بننے کے مستحق ہیں۔ انہوں نے بلاول بھٹو زرداری کی عوامی خدمات کو سراہتے ہوئے کہا کہ انہوں نے بارشوں کے دوران راتوں کو جاگ کر متاثرین کی مدد کی اور انہیں کھانے سمیت دیگر ضروری سہولیات فراہم کیں۔ مزید یہ کہ بلاول بھٹو زرداری کے وژن کے تحت ہر دیہات میں 100 نئے گھر تعمیر کیے جائیں گے اور یہ دنیا کا ایک عظیم منصوبہ ثابت ہوگا۔ انہوں نے صحت کے شعبے میں پاکستان پیپلز پارٹی کی خدمات کا ذکر کرتے ہوئے کہا کہ پارٹی عوام کی خدمت پر یقین رکھتی ہے اور یہی وجہ ہے کہ ان شاء اللہ آئندہ انتخابات میں بلاول بھٹو زرداری کو ملک کا وزیراعظم بنایا جائے گا۔ شرجیل انعام میمن نے مزید کہا کہ عوام ہمیشہ پیپلز پارٹی پر اعتماد کرتے رہے ہیں اور اسی وجہ سے مخالفین کے تمام اتحاد ناکام ہوئے ہیں۔ انہوں نے واضح کیا کہ پاکستان پیپلز پارٹی دریائے سندھ پر کوئی کینال بنانے نہیں دے گی اور جب تک پیپلز پارٹی موجود ہے، اس کی قیادت نے واضح کر دیا ہے کہ کسی بھی کینال کی تعمیر کی اجازت نہیں دی جائے گی۔ انہوں نے مزید کہا کہ پیپلز پارٹی نے ہی کالاباغ ڈیم کے منصوبے کا خاتمہ کیا، این ایف سی ایوارڈ دیا اور صوبائی خودمختاری کو یقینی بنایا۔ عوام سے خطاب کرتے ہوئے انہوں نے کہا کہ کسی کی باتوں میں نہ آئیں کیونکہ کچھ لوگ آپ کو گمراہ کرنے کی کوشش کر رہے ہیں، لیکن پیپلز پارٹی عوام کے دلوں میں ہے اور اس کی محبت کو کوئی ختم نہیں کر سکتا۔ انہوں نے کہا کہ اگر پاکستان کی تاریخ سے پیپلز پارٹی کے دور کو نکال دیا جائے تو کوئی قابل ذکر کارنامہ باقی نہیں بچے گا، کیونکہ ملک کے دفاعی، صنعتی اور جمہوری ترقی میں پیپلز پارٹی نے کلیدی کردار ادا کیا ہے۔ پاکستان کے میزائل پروگرام، اسٹیل مل، ایٹمی قوت اور آئین جیسے عظیم کارنامے پیپلز پارٹی کی ہی مرہون منت ہیں۔تقریب سے خطاب کرتے ہوئے سید ناصر حسین شاہ نے کہا کہ چیئرمین بلاول بھٹو زرداری کے وژن کے تحت اس تقریب کا انعقاد کیا گیا ہے۔ انہوں نے مزید کہا کہ وزیر اعلیٰ سندھ سید مراد علی شاہ سمیت تمام کابینہ اراکین پارٹی قیادت کے مشن پر عمل پیرا ہیں۔ انہوں نے بتایا کہ یہ ہوم سولر سسٹم بینظیر انکم سپورٹ پروگرام کے تحت صرف 6 ہزار روپے کی قیمت پر دیے جا رہے ہیں اور دوسرے مرحلے میں مزید مستحق اور غریب افراد کو یہ سہولت فراہم کی جائے گی۔ انہوں نے اس بات کا بھی اعلان کیا کہ بلاول بھٹو زرداری کی ہدایت پر بجلی گرڈز کو مستحکم کرنے کا منصوبہ شروع کیا جائے گا، جس سے 100 سے 300 یونٹ تک بجلی استعمال کرنے والے صارفین کو مفت بجلی فراہم کی جائے گی۔ سید ناصر حسین شاہ نے کہا کہ پاکستان پیپلز پارٹی کی سندھ حکومت کی جانب سے 21 لاکھ گھروں کی تعمیر کی جا رہی ہے، جنہیں مالکانہ حقوق کے ساتھ دیا جائے گا۔