اعلیٰ ثانوی تعلیمی بورڈ کراچی نے چیئرمین سید شرف علی شاہ کی ہدایت پر طلباء کے وسیع تر مفاد میں انٹرمیڈیٹ کے سالانہ امتحانات برائے 2025ء میں شرکت کے خواہشمند سائنس، کامرس،آرٹس،ہوم اکنامکس گروپس (ایسے پرائیویٹ امیدوار جو انٹرمیڈیٹ کے گزشتہ امتحانات میں ایک یاکئی پرچوں میں ناکام رہے ہوں) بشمول امپروومنٹ آف ڈویژن/گریڈ، بینیفٹ کیسز،ایڈیشنل سبجیکٹس، شارٹ سبجیکٹس، ٹی پی (ٹوٹل پیپرز) کے پرائیویٹ امیدواروں کیلئے بروز پیر 3 مارچ 2025ء سے بروز جمعرات 27مارچ 2025ء تک ایک ہزار روپے لیٹ فیس کے ساتھ امتحانی فارم جمع کروانے کی نئی تاریخوں کا اعلان کردیا ہے۔ انٹرمیڈیٹ حصہ دوم (فریش) آرٹس اور کامرس کے ایسے پرائیویٹ امیدوار جو ناگزیر وجوہات کی بناء پر اپنے امتحانی فارم ابھی تک جمع نہیں کرواسکے ہیں وہ بھی درج بالا تاریخوں میں ایک ہزار روپے لیٹ فیس کے ساتھ اپنے امتحانی فارم جمع کرواسکتے ہیں۔ یاد رہے IBCCاور BOGکے اجلاس میں کیے گئے فیصلے کے مطابق امیدوار چار سال امپروومنٹ آف ڈویژن کے چانس سے فائدہ اٹھاسکتے ہیں۔انٹربورڈ کے جاری کردہ نوٹیفکیشن کے مطابق امتحانات میں شرکت کے خواہشمند امیدوار امتحانی فارم اور فیس واؤچربورڈ کی آفیشل ویب سائٹ www.biek.edu.pk سے ڈاؤن لوڈ کر کے مکمل طور پر بھرکر 17یا زیادہ گریڈ کے سرکاری افسر سے تصدیق کروائیں اور ضروری دستاویزات منسلک کرنے کے بعد بورڈ آفس کی لائبریری میں قائم یونائیٹڈ بینک لمیٹڈ (UBL) کے بوتھ میں جمع کرواسکتے ہیں۔ طلبہ انٹربورڈ کراچی کی دی گئی سہولت سے سے فائدہ اٹھاتے ہوئے اپنے امتحانی فارم اور فیس یو بی ایل کی کسی بھی برانچ میں اکاؤنٹ نمبر UBL-CMA-252536591 میں جمع کرواسکتے، طلباء جمع کرائی گئی فیس کا واؤچر اور اپنا امتحانی فارم شیڈول کے مطابق دی گئی تاریخوں میں بورڈ آفس کی انکوائری میں جمع کروانے کے پابند ہوں گے بصورت دیگر ان کا فارم قبول نہیں کیا جائے گا اور فیس ضبط کرلی جائے گی۔امتحانی فام کیساتھ انٹرمیڈیٹ حصہ اول یا پچھلی مارکس شیٹ کی کاپی، میٹرک کے سرٹیفکیٹ یا مارکس شیٹ کی کاپی، رجسٹریشن کارڈ کی فوٹو کاپی یا رجسٹریشن فارم جمع کروانے کی سلپ لازمی منسلک کرنا ہوگی۔
