پنجاب میں انسانی حقوق اور بین المذہبی ہم آہنگی کو فروغ دینے پر زور
لاہور، 25 فروری:: پارلیمانی سیکرٹری برائے انسانی حقوق واقلیتی امور سونیا آ شر کی زیر صدارت انسانی حقوق کے کیمپ آفس میں ایک اہم اجلاس منعقد ہوا۔ اجلاس میں ایڈیشنل سیکرٹری رضوانہ نوید ، ڈائریکٹر محمد یوسف کے ہمراہ مختلف سول سوسائٹی تنظیموں کے نمائندے شامل ہوئے جن میں ایس پی او، ایچ ایف او، یوتھ ڈیولپمنٹ فائونڈیشن، برگد، چینج ش ہوم نیٹ ، سدھار سوسائٹی ،فیسز پاکستان ،بیداری، سرچ فار جسٹس ، پیس اینڈ جسٹس نیٹ ورک وغیرہ کے نمائندگان موجود تھے۔ اجلاس کا بنیادی مقصد سول سوسائٹی تنظیموں اور حکومت کے درمیان بہتر رابطہ اور تعاون کو فروغ دینا اور سرگرمیوں کے تکرار کو کم کرنے اور پنجاب حکومت کی رہنمائی کے تحت مشترکہ منصوبوں کو فروغ دینے کی حکمت عملیوں پر تبادلہ خیال کرنا تھا۔
سونیا آشر، پارلیمانی سیکرٹری برائے انسانی حقوق و اقلیتی امور نے پنجاب حکومت کے پختہ عزم کا اظہار کیا کہ وہ ایک پرامن، جامع اور ہم آہنگ معاشرے کے قیام کے لیے کام کر رہی ہے۔ انہوں نے کہا، “پنجاب حکومت تمام شراکت داروں کی محنت اور لگن کی قدر کرتی ہے جو ایک پرامن اور جامع پنجاب کے حصول کے لیے مل کر کام کر رہے ہیں۔ ہماری حکومت انسانی حقوق اور بین المذہبی ہم آہنگی کو فروغ دینے کے لیے مکمل طور پر پرعزم ہے، اور ہم سول سوسائٹی کے کردار کو تسلیم کرتے ہیں۔ مؤثر تعاون کے ذریعے ہم چیلنجز پر قابو پا سکتے ہیں اور پنجاب کو ایک مضبوط، متحد اور ہم آہنگ معاشرہ بنا سکتے ہیں۔”
ایڈیشنل سیکرٹری برائے انسانی حقوق رضوانہ نوید نے اجلاس میں شریک افراد کو ہم آہنگی کمیٹی کی جاری سرگرمیوں اور منصوبوں کے بارے میں آگاہ کیا۔ انہوں نے مختلف شراکت داروں کے درمیان تعاون کو فروغ دینے کی اہمیت پر زور دیا تاکہ انسانی حقوق کے منصوبوں کا اثر زیادہ ہو سکے۔ انہوں نے سول سوسائٹی اور محکمے کے درمیان تعلقات کو مستحکم کرنے کی ضرورت پر بھی زور دیا تاکہ حکومت کی پالیسیوں اور پروگراموں کو مؤثر طریقے سے نافذ کیا جا سکے۔
اجلاس کے اختتام پر تمام شرکاء نے پنجاب میں انسانی حقوق، امن اور بین المذہبی ہم آہنگی کے فروغ کے لیے مشترکہ کوششوں کو جاری رکھنے کا عہد کیا۔ شرکاء نے پنجاب حکومت کے وژن کی حمایت کی اور ایک بہتر اور جامع مستقبل کے لیے تعاون کرنے کے لیے ملکر آگے بڑھنے کے عزم کا اظہار کیا۔
