کراچی میں ہیوی ٹریفک کے صبح 6 سے رات 10 بجے تک شہر میں داخلے پر پابندی عائد کر دی گئی۔
کمشنر کراچی کی جانب سے جاری نوٹیفکیشن کے مطابق شہریوں کے تحفظ اور ٹریفک کا بہاؤ یقینی بنانے کیلئے دفعہ 144 نافذ کی گئی ہے، جس کے تحت ہیوی ٹریفک کے صبح 6 بجے سے رات 10 بجے تک آمدورفت پر پابندی ہو گی۔
اعلامیے میں کہا گیا ہے کہ رات 10 سے صبح 6 بجے تک ہیوی ٹریفک کو شہر میں داخلے کی اجازت ہو گی۔
کمشنر کراچی کی جانب سے جاری اعلامیے میں کہا گیا ہے کہ پابندی کا اطلاق ادویات، پانی، خوردنی تیل لے جانے والی گاڑیوں پر نہیں ہو گا۔
خیال رہے کہ کراچی میں دن دیہاڑے ڈمپروں کی جانب سے موٹر سائیکل سواروں اور دیگر گاڑیوں کو ٹکر مارنے کے مختلف حادثات میں رواں سال اب تک 108 افراد جان کی بازی ہار چکے ہیں جبکہ حادثات کے بعد مشتعل افراد کی جانب سے گاڑیوں کو جلائے جانے کے متعدد واقعات بھی رپورٹ ہو چکے ہیں۔
=================
لندن: ترک قونصل خانے کے باہر قرآن پاک نذر آتش کرنے کی کوشش
لندن میں ترک قونصل خانے کے باہر گزشتہ روز ایک شخص نے قرآن پاک نذر آتش کرنے کی کوشش کی۔
برطانوی میڈیا کے مطابق سماجی رابطے کے پلیٹ فارم ایکس پر جاری ہونے والی ایک ویڈیو میں دیکھا جاسکتا ہے کہ ایک نامعلوم شخص ترک قونصل خانے کے باہر قرآن پاک کو نذر آتش کررہا ہے جس کے بعد ایک اور شخص اس کے ہاتھ سے قرآن پاک لے کر اس شخص کو زمین پر گرا کر اسے لاتیں مارتا ہے اور اس پر تھوکتا ہے۔
عینی شاہدین کے مطابق حملہ آور نے چاقو نکال کر قرآن پاک نذر آتش کرنے والے شخص کو زخمی کیا۔
مقامی پولیس کے مطابق پولیس کو گزشتہ روز دوپہر 2 بج کر 11 منٹ پر ایک شخص پر حملے کی اطلاع ملی، متاثرہ شخص کو انگلی پر چوٹ آئی تاہم اسے چاقو کے زخم نہیں آئے۔
پولیس کے مطابق اہلکار چند منٹوں میں موقع پر پہنچے اور ایک شخص کو خطرناک ہتھیار رکھنے اور شدید جسمانی نقصان پہنچانے کے شبہے میں گرفتار کرلیا۔
====================
بھارت کے معروف ریپر نے زہر کھا کر خوکشی کرلی، بیوی پر ذہنی دباؤ ڈالنے کا الزام
اڈیسہ میں ریپر کی فیملی نے ان کی اہلیہ اور دیگر افراد کے خلاف کارروائی کیلئے درخواست بھی جمع کرادی— فوٹو:فائہل
بھارت کے معروف 32 سالہ ریپر ابھینو سنگھ المعروف جگرناتھ نے زہر کھا کر خودکشی کرلی۔
بھارتی میڈیا کے مطابق بھارتی ریپر کی لاش بینگلورو میں کرائے پر حاصل کیے گئے اپارٹمنٹ سے ملی، یہ اپارٹمنٹ انہوں نے 7 روز قبل ہی کرائے پر لیا تھا۔
پولیس کے مطابق 32 سالہ ریپر نے روم میٹ کے ساتھ کھانا کھایا اور پھر اپنے کمرے میں جا کر زہر کھا کر خودکشی کرلی۔
پولیس حکام نے بتایاکہ ریپر کے کمرے سے کوئی خط بھی نہیں ملا تاہم تحقیقات جاری ہیں اور زہر کے حوالے سے رپورٹ کا انتظار کیا جا رہا ہے۔
دوسری جانب بھارتی ریپر کی فیملی نے ان کی اہلیہ کی جانب سے ذہنی طور پر دباؤ ڈالنے اور ہراساں کرنے کا الزام عائد کیا ہے۔ بھارتی ریاست اڑیسہ میں ریپر کی فیملی نے ان کی اہلیہ اور دیگر افراد کے خلاف کارروائی کیلئے درخواست بھی جمع کرادی۔
