کراچی: انڈس کنسورشم اسلام آباد کے سی ای او حسین جروار نے گلستانِ جوہر، کراچی میں واقع این ڈی ایف بحالی مرکز کا دورہ کیا، جہاں این ڈی ایف پاکستان کے صدر، عابد لاشاری نے انہیں مرکز کی ذھنی معذور بچوں کے لیے مفت بحالی خدمات کے بارے میں تفصیلی بریفنگ دی۔ یہ خدمات، جن میں فزیوتھراپی، اسپیچ تھراپی، آکوپیشنل تھراپی، سائیکو تھراپی، اور اصلاحی تھراپی شامل ہیں، محکمہ برائے معذور افراد کی بااختیاری (DEPD)، حکومت سندھ کے اشتراک سے فراہم کی جا رہی ہیں۔ دورے کے دوران، حسین جروار نے این ڈی ایف پاکستان کی جانب سے ڈاؤن سنڈروم، آٹزم، سیریبرل پالسی (CP)، اور دیگر معذوریوں میں مبتلا بچوں کی بحالی کے لیے کی جانے والی کوششوں کو سراہا۔ انہوں نے اس بات پر زور دیا کہ گلستانِ جوہر، کراچی سمیت نوابشاہ اور لاڑکانہ جیسے دیہی علاقوں میں یہ خدمات فراہم کرنا این ڈی ایف کا ایک عظیم مشن ہے۔ انہوں نے عالمی تنظیموں، کارپوریٹ سیکٹر اور انفرادی مخیر حضرات سے بھی اپیل کی کہ وہ اس نیک مقصد میں حصہ ڈالیں تاکہ ان اہم خدمات کا
استحکام اور توسیع ممکن ہو سکے این ڈی ایف پاکستان کو انڈس کنسورشیم کا ایک فعال رکن تسلیم کرتے ہوئے، حسین جروار نے این ڈی ایف کے اقدامات کو مزید مستحکم کرنے کے لیے مکمل تعاون اور ممکنہ تکنیکی معاونت کی یقین دہانی کرائی۔ اس موقع پر، عابد لاشاری نے حسین جروار اور ان کی ٹیم کا شکریہ ادا کیا اور ان کی حوصلہ افزائی کو سراہا۔ انہوں نے محکمہ برائے معذور افراد کی بااختیاری (DEPD)، حکومت سندھ کے نمایاں کردار کو اجاگر کیا اور کراچی کے کارپوریٹ سیکٹر کی جانب سے بحالی خدمات کے فروغ میں مزید تعاون کی ضرورت پر زور دیا۔ این ڈی ایف پاکستان معذور بچوں کو بااختیار بنانے کے عزم پر قائم ہے، تاکہ سندھ کے مختلف علاقوں میں انہیں معیاری تھراپی اور معاونت فراہم کی جا سکے۔
