13 فروری 2025
راولپنڈی
عوام پاکستان پارٹی کے رہنما چوہدری انعام ظفر نے کہا کہ نوجوان عوام پاکستان پارٹی کی ترجیح ہیں۔ہم چاہتے ہیں کہ نوجوانوں کو یکساں بنیاد پر جدید علوم اور فنی تربیت دی جائے،تاکہ نوجوان پاکستان کی معاشرتی، سماجی و اقتصادی ترقی میں اہم کردار ادا کر سکیں۔
انھوں نے یہ بات عوام پاکستان پارٹی کے سیکریٹریٹ میں یوتھ ونگ کے ممبران سے ملاقات کے دوران کہی۔اس موقع پر نوجوانوں کی کثیر تعداد موجود تھی جنھوں نے عوام پاکستان پارٹی کے وژن کو سراہا،جب کہ سٹی کنوینر شعبہ خواتین ثمینہ شعیب ، مردانہ ونگ کنوینر سردار نزیر احمد کشمیری ان کے ہمراہ موجود تھے۔شمالی پنجاب کے کنوینر سرفراز افضل نے بھی ویڈیو لنک سے خطاب کیا۔چوہدری انعام ظفر نے نوجوانوں سے ملاقات میں کہا کہ نوجوان پاکستان کا قیمتی اثاثہ ہیں،جنھیں یکساں بنیادوں پر جدید علوم سکھانا ہوں گے،اگر ایسا نہ کیا گیا تو معاشرتی و معاشی تفریق جنم لے گی ،جو مزید انتشار کا باعث بنے گی ۔انھوں نے کہا کہ عوام پاکستان پارٹی کی اولین ترجیح نوجوان طبقہ کی فلاح و بہبود ہے۔انھوں نے کہا کہ پاکستان میں 60 فیصد سے زائد آبادی 30 سال سے کم عمر جوان افراد کی ہے۔ اگر نوجوانوں کو موثر روزگار فراہم کیا جائے ،تو یہی نوجوان پاکستان کی معاشی ترقی میں نمایاں تبدیلی لائیں گے۔ترقی یافتہ ممالک کی طرح ہمارے نوجوانوں کے لیے اعلی تعلیم کے حصول کے ساتھ فنی تربیت کو لازمی قرار دینا ہوگا۔چوہدری انعام ظفر نے کہا کہ اگر بروقت اقدامات نہ اٹھائے گئے ، تو نوجوان معاشرتی ،سماجی اور سیاسی بدامنی کا شکار ہو سکتے ہیں۔عوام پاکستان پارٹی ایسے اقدامات اٹھانے کی خواہش مند ہے ،جس سے نوجوانوں کے لیے روزگار کے فائدہ مند مواقع پیدا ہوسکیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
