امریکا سے بے دخل کیے گئے 119 افراد کا جہاز پاناما پہنچ گیا۔
پاناما حکام کے مطابق بے دخل کیے گئے افراد میں پاکستان، چین سمیت مختلف ممالک کے شہری شامل ہیں۔
حکام نے بتایا کہ پاناما نے امریکا کو بے دخل افراد کے لیے عارضی راستہ فراہم کیا، امریکا سے ملک بدر افراد کو پاناما سے ان کے ممالک روانہ کیا جائے گا۔
خیال رہے کہ امریکہ سے غیر قانونی تارکین وطن کا انخلا شروع ہو گیا ہے۔ انہیں فوجی طیاروں میں لاد کر سرحد پار لے جایا جا رہا ہے۔
ایسی ہی ایک پرواز کی تصویر وائٹ ہاؤس نے سوشل میڈیا پلیٹ فارم ایکس پر شیئر کی ہے
================
امریکا نے غیرقانونی تارکین وطن کی ملک بدری شروع کردی، بھارتیوں کوفوجی طیارے میں واپس بھیج دیا، ٹرمپ کے اقدامات کے خلاف امریکا میں لوگ سڑکوں پرنکل آئے، لاس اینجلس میں احتجاجی مظاہرہ کیا گیا۔
امریکی صدر ڈونلڈ ٹرمپ کی ہدایت پر حکام نے غیرقانونی تارکین وطن کے خلاف کارروائی کرتے ہوئے ان کی ملک بدری شروع کردی ہے۔
امریکی حکام نے پہلے مرحلے میں 205 بھارتیوں کو خصوصی امریکی فوجی طیارے میں وطن واپس بھیج دیا ہے، جبکہ مزید ملکوں کے تارکین وطن کو بھی واپس بھیجا جائے گا۔
ادھر امریکی صدر کی متنازع پالیسیوں کے خلاف امریکی شہری سراپا احتجاج ہیں، لاس اینجلس میں ڈونلڈ ٹرمپ کے اقدامات کے خلاف احتجاجی مظاہرہ کیا گیا۔ بعد ازاں پولیس نے مظاہرین کو پر امن طورپر منتشر کر دیا
====================
متحدہ عرب امارات میں خودکشی کی کوشش کرنے والے ملزم سمیت 12 ممالک سے 131 پاکستانیوں کو ڈی پورٹ کر دیا گیا۔
ان پاکستانیوں کو گزشتہ 37 گھنٹوں کے دوران ڈی پورٹ کیا گیا جن میں سے 16 افراد کو انسدادِ انسانی اسمگلنگ سرکل منتقل کر دیا گیا ہے جبکہ 6 کو قلات، ساہیوال، گوجرانوالہ، لاڑکانہ اور راولپنڈی پولیس کے حوالے کیا گیا ہے۔
امیگریشن ذرائع کے مطابق سعودی عرب میں بلیک لسٹ، منشیات کیسز، پاسپورٹ گم کرنے اور سزا پوری ہونے، کام سے مفرور 74 پاکستانیوں کو بے دخل کر دیا گیا۔
اسٹوڈنٹ ویزا کے7 افراد سمیت 86 مسافر آف لوڈ
امارات میں خودکشی کی کوشش، بلیک لسٹ، منشیات کیس، غیر قانونی داخلے اور قیام پر غیر قانونی امور اور چوری میں ملوث پاکستانیوں کو ڈی پورٹ کر دیا گیا۔
علاوہ ازیں قبرص، عمان، کمبوڈیا، عراق، بحرین، آزربائیجان، میکسیکو سے بھی پاکستانی شہریوں کو ڈی پورٹ کیا گیا ہے۔
====================
مجھے کسی کا کوئی خط نہیں ملا، خط ملا بھی تو نہیں پڑھوں گا، آرمی چیف
اگر کوئی خط ملا تو وزیراعظم کو بھجوادوں گا، خط کی باتیں سب چالیں ہیں، صحافیوں سے غیر رسمی گفتگو
آرمی چیف جنرل عاصم منیر نے کہا ہے کہ مجھے کسی کا کوئی خط نہیں ملا، خط ملا بھی تو نہیں پڑھوں گا۔
وزیراعظم ہاؤس میں ترک صدر کے اعزاز میں دیے گئے ظہرانے میں صحافیوں سے غیر رسمی گفتگو کرتے ہوئے آرمی چیف جنرل عاصم منیر نے کہا کہ مجھے کسی کا کوئی خط نہیں ملا، خط ملا بھی تو نہیں پڑھوں گا۔
آرمی چیف نے کہا کہ اگر کوئی خط ملا تو وزیراعظم کو بھجوادوں گا، خط کی باتیں سب چالیں ہیں۔
جنرل عاصم منیر نے مزید کہا کہ ملک بہت اچھے انداز سے آگے بڑھ رہا ہے، پاکستان میں ترقی ہو رہی ہے، پاکستان آگے بڑھ رہا ہے اور پاکستان کو آگے بڑھنا ہے۔
بانی پی ٹی آئی کا آرمی چیف کو تیسرا خط، پی ٹی آئی وکیل فیصل چوہدری کی تصدیق
خیال رہے کہ سابق وزیراعظم اور پاکستان تحریک انصاف (پی ٹی آئی) کے بانی عمران خان آرمی چیف جنرل عاصم منیر کو اب تک 3 خط لکھ چکے ہیں۔
عمران خان کی جانب سے پاک فوج کے سربراہ کو پہلا خط 3 فروری کو لکھا گیا تھا جس میں انہوں نے پاک فوج کے سربراہ سے پالیسیوں میں تبدیلی کی اپیل کی تھی۔
خط میں ان کا کہنا تھا کہ ساری چیزوں کا نزلہ فوج پر گررہا ہے، 2024 کا الیکشن، 26ویں آئینی ترمیم، پیکا ایکٹ فوج اور عوام کے درمیان فاصلے کی وجوہات ہیں۔
بانی پی ٹی آئی نے آرمی چیف جنرل عاصم منیر کو دوسرا خط 8 فروری کو لکھا تھا جس میں ان کا کہنا تھا کہ گن پوائنٹ پر 26ویں آئینی ترمیم کے ذریعے عدالتی نظام پر قبضہ کیا گیا۔
خط میں کہا گیا کہ مجھے موت کی چکی میں رکھا گیا ہے اور 20 دن تک مکمل لاک اپ میں رکھا گیا جہاں سورج کی روشنی تک نہیں پہنچتی تھی۔
گزشتہ روز 12 فروری کو سابق وزیراعظم عمران خان کی جانب سے آرمی چیف جنرل عاصم منیر کو تیسرا خط لکھے جانے کی خبر سامنے آئی تھی۔
اڈیالہ جیل کے باہر میڈیا سے گفتگو میں بانی پی ٹی آئی کے وکیل فیصل چوہدری کا کہنا تھاکہ عمران خان نے آرمی چیف کو تیسرا خط لکھا ہے جس میں الیکشن فراڈ کے ذریعے اقلیت کو اکثریت پر ترجیح دینے کا معاملہ اٹھایا ہے۔
یاد رہے کہ گزشتہ دنوں سابق وزیراعظم عمران خان نے آرمی چیف جنرل عاصم منیر کو خط لکھے تھے جن میں پالیسیاں تبدیل کرنے کی درخواست کی گئی تھی۔
اس پر سیکیورٹی ذرائع نے کہا تھاکہ آرمی چیف کو عمران خان کا کوئی خط موصول نہیں ہوا، ایسے کسی خط کو پڑھنے میں کوئی دلچسپی نہیں۔
