کالج آف فزیشنز اینڈ سرجنز پاکستان، ریجنل سینٹر لاہور میں انٹرنیشنل سرجیکل کانفرنس 2025 کے سلسلہ میں سیمینار کا انعقاد
کالج آف فزیشنز اینڈ سرجنز پاکستان، ریجنل سینٹر لاہور میں انٹرنیشنل سرجیکل کانفرنس 2025 کے سلسلہ میں
Smart Learning in Surgical Education: A Threat or a Treat”” کے موضوع پر سیمینار کا انعقاد کیا گیا جس میں پریذیڈنٹ رائل کالج آف سرجنز ایڈنبرا پروفیسر روون پارکس (Prof Rowan Parks) اور سینئر وائس پریذیڈنٹ سی پی ایس پی پروفیسر خالد مسعود گوندل نے بطور چیف گیسٹس شرکت کی۔
پریذیڈنٹ کالج آف سرجنز سری لنکا ڈاکٹر ڈومینڈا ایریارتنے (Dr. Duminda Ariyaratne) نے بطور گیسٹ آف آنر شرکت کی۔
سیمینار کا آغاز تلاوت کلام پاک اور قومی ترانے سے ہوا۔پروفیسر احمد عزیر قریشی نے سٹیج سیکرٹری کے فرائض سر انجام دیے
سیمینار میں ڈائریکٹر جنرل نیشنل ریزیڈنسی پروگرام سی پی ایس پی پروفیسر محمود ایاز، ڈائریکٹر جنرل میڈیکل ایجوکیشن پروفیسر عامر زمان خان، ڈائریکٹر جنرل ایڈوانسڈ سکلز ڈیپارٹمنٹ پروفیسر ابرار اشرف علی، صدر سوسائٹی آف سرجنز لاہور پروفیسر وارث فاروقہ،نائب صدر پروفیسر قمر اشفاق، جنرل سیکریٹری ڈاکٹر شاہد فاروق، پرنسپل علامہ اقبال میڈیکل کالج پروفیسر سید اصغر نقی،پروفیسر عبدالمجید چوہدری، پروفیسر محمود شوکت ، میجر جنرل پروفیسر فرحان مجید، ڈینز پروفیسر غلام مصطفے آرائیں اور پروفیسر کامران خالد خواجہ، سی پی ایس پی کونسلرز اور ریذیڈنٹس کی کثیر تعداد نے شرکت کی۔
سینئر وائس پریذیڈنٹ پروفیسر خالد مسعود گوندل نے اپنے خطاب میں اعلیٰ طبی تعلیم کے فروغ میں سی پی ایس پی کے کردار اورقومی اور بین الاقوامی خدمات پر روشنی ڈالی۔انہوں نے کہا کہ کالج آف فزیشنز اینڈ سرجنز پاکستان اعلیٰ طبی تعلیم کا سب سے بڑا اور بہترین ادارہ ہے۔انہوں نے سی پی ایس پی کے فیلوشپ اور ممبرشپ پروگرامز کے متعلق بھی آگاہی دی۔ اُن کا مزید کہنا تھا کہ سی پی ایس پی میں معیار کو برقرار رکھتے ہوئے نئے پروگرامز کی منظوری اور شمولیت کا سلسلہ جاری ہے۔سی پی ایس پی کے ذریعے پاکستان میں ATLSاور BLS ٹریننگ کورسز کا آغاز ہوا۔ اُن کا مزید کہنا تھا کہ سی پی ایس پی کامیابی کے ساتھ پوسٹ گریجویٹس کے لیے تربیتی سیشنز کا انعقاد کر رہا ہے۔ پوسٹ گریجویٹ میڈیکل ایجوکیشن کے چیلنجز اور ان سے نمٹنے کی حکمت عملی کے بارے میں بھی حاضرین کو آگاہ کیا ۔انہوں نے بتایا کہ ہم اپنے امتحانی نظام کو مکمل طور پرآن لائن کر رہے ہیں اور جلد ہی پیپر لیس پالیسی پر عمل پیرا ہونگے۔ اعلیٰ طبی تعلیم کے فروغ اور مریضوں کو جدید طبی سہولیات کی فراہمی کے سلسلہ میں سی پی ایس پی دوسرے ممالک کے ساتھ باہمی تعاون، شراکت اور مساوات کی پالیسی پر یقین رکھتا ہے۔بین الاقوامی اعلیٰ طبی تعلیمی اداروں نے سی پی ایس پی پر مکمل اعتماد کا اظہار کیا ہے۔سی پی ایس پی کے ہر ریجنل سینٹر میں آرٹیفیشل انٹیلیجنس کا شعبہ قائم کیا جائے گا۔
پروفیسر روون پارکس نے اپنے خطاب میں کہا کہ پاکستان میں یہ میرا تیسرا دورہ ہے۔ میں پروفیسر خالد مسعود گوندل کا مدعو کرنے پر بے حد مشکور ہوں۔ پاکستان کی میزبانی دیکھ کر بہت اچھا لگا۔ مستقبل میں پوری دنیا میں مریضوں کی دیکھ بھال کے اعلیٰ معیار کو برقرار رکھنا ایک بڑا چیلنج ہے۔انہوں نے ملک کے لیے سی پی ایس پی کی طبی خدمات کی تعریف کی۔
ڈائریکٹر جنرل نیشنل ریذیڈنسی پروگرام سی پی ایس پی پروفیسر محمود ایاز نے روبوٹک سرجری کی تعلیم میں سمارٹ لرننگ کی اہمیت پر روشنی ڈالی۔ اُن کا کہنا تھا کہ روبوٹک سرجری میں انفیکشن کا رسک بہت کم ہے۔ انہوں نے شرکاء کو روبوٹک سرجری سے متعلق ویڈیو ٹیوٹوریل بھی دکھایا۔
اس موقع پر دو سیشنز کا انعقاد ہوا ،پہلے سیشن میں پروفیسر سلمان شاہ ، پروفیسر عتیق الزمان، پروفیسر ابرار اشرف علی، پروفیسر فیصل سعود ڈار نے اور دوسرے سیشن میں پروفیسر محمود شوکت،پروفیسر سید اصغر نقی، پروفیسر عابد اشعراورمیجر جنرل پروفیسر فرحان مجید نے سرجیکل ایجوکیشن پر مشتمل مختلف موضوعات پر لیکچرز دیئے اور سوال و جواب کا سیشن بھی ہوا۔
سیمینار کے اختتام پر مہمانان گرامی اور مقررین کو شیلڈز پیش کی گئیں اور پروفیسر روون پارکس نے سی پی ایس پی ریجنل سینٹر لاہور میں شجرکاری مہم کا آغاز کرتے ہوئے پودا بھی لگایا۔
