وفاقی وزیر منصوبہ بندی پروفیسر احسن اقبال کی کنگ ایڈورڈ میڈیکل یونیورسٹی آمد۔

وفاقی وزیر منصوبہ بندی پروفیسر احسن اقبال کنگ ایڈورڈ میڈیکل یونیورسٹی کے 165 ویں وائٹ کوٹ تقریب کے شرکاء سے حلف لینے کے بعد اپنے خیالات کا اظہار کرتے ہوئے

وفاقی وزیر منصوبہ بندی پروفیسر احسن اقبال کی کنگ ایڈورڈ میڈیکل یونیورسٹی آمد۔
آمد کا مقصد پنجاب بھر سے ایم بی بی ایس کے طلبا و طالبات کے اعزاز میں وائٹ کوٹ تقریب میں بطور مہمان خصوصی شرکت تھا۔
پروفیسر احسن اقبال نے ایم بی بی ایس کے طالبعلموں سے خدمت انسانیت کا حلف لیا۔ اس موقع پر وائس چانسلر پروفیسر محمود ایاز، پرو وائس چانسلر پروفیسر محمد معین، رجسٹرار پروفیسرمحمد عمران، پروفیسر ابرار اشرف، پروفیسر ثاقب سہیل، پروفیسر سائرہ افضل، پروفیسر امیر افضل، پروفیسر احسن نعمان، پروفیسر فرحانہ سجاد، پروفیسر شکیل احمد، فیکلٹی ممبران طلبا و طالبات اور والدین کی کثیر تعداد موجود تھی۔
پروفیسر احسن اقبال کا اظہار خیال کرتے ہوئے کہنا تھا کہ میرے لئے اس باوقار تقریب میں شرکت کرنا فخر کی بات ہے۔ آج کی یہ تقریب آپ کی زندگی میں نئے سفر کا آغاز ہے میں تمام والدین کو بھی مبارکباد پیش کرتا ہوں جن کی محنت سے ان کے بچوں کا اس عظیم طبی درسگاہ میں داخلہ ہوا آپ کو اعلیٰ طبی مہارتوں کو حاصل کرنے کے علاوہ، اخلاقیات، انسانی ہمدردی جیسے بنیادی اصول سیکھنے کی بھی ضرورت ہے۔ انہوں نے کہا کہ میں وائس چانسلر کنگ ایڈورڈ میڈیکل یونیورسٹی پروفیسر محمود ایاز کے پروفیشنلزم کا مداح ہوں۔
وائٹ کوٹ علامت ہے احساس، انسانی زندگیوں کے تحفظ اور لوگوں کی فلاح کی بحیثیت معالج آپ لوگ نہ صرف علاج کریں گے بلکہ انسانی ہمدردی کو بھی اپنائیں۔ ان کا مزید کہنا تھا کہ پاکستان کے قیام سے لے کر اب تک ہم نے بہت ساری کامیابیاں حاصل کیں اور آج یہ ملک دنیا کی ساتویں ایٹمی طاقت کے طور پر مانا جاتا ہے۔ شرکاء کو مخاطب کرتے ہوئے انہوں نے کہا کہ
میرے نوجوانوں کسی بھی ملک کی ترقی امن، سیاسی استحکام، 10 سالہ موثر حکمت عملی اور اکنامک ایجنڈے پر مبنی ہوتی ہے
اگر ہم نے بھی دنیا کے ساتھ چلنا ہے تو ہمیں ان اصولوں پر عمل کرنا پڑے گا آئیں
ہم مل کر ایک ٹیم کی صورت ملک کے لئے کام کریں۔ پروفسیر احسن اقبال کا کہنا تھا کہ ہم نے اپریل 2022 میں ملک کو ڈیفالٹ ہونے سے بچایا اور ہم نے لہولہان معیشت کو بچانے کے لئے قربانیاں دیں اور آج دنیا پاکستان کی ترقی کی قائل ہے۔ اب ہم تاریخ کی چوتھی اڑان بھر رہے ہیں ہمارا فرض ہے کہ ہم اس چوتھی اڑان کی حفاظت کریں تاکہ بھارت جیسے ممالک سے آگے نکلیں۔
ہمیں ذاتی، مذہبی اور سیاسی اختلافات کو بھلا کر ملکی سلامتی و ترقی کا سوچنا ہوگا یاد رکھیں کامیابی اسی کو ملتی ہے جو ایک ٹیم کی ماند کام کرے،
ہم نے اڑان پاکستان کے تحت صحت کے شعبے میں بھی کام جاری رکھا ہے اور مستقبل کے منصوبے کے تحت اگلے تین سالوں میں ہیپاٹائٹس، شوگر، بڑھتی ہوئی آبادی اور دیگر امراض کے تدارک پر کام جاری ہے۔ معزز سٹوڈنٹس آپ لوگ جدید ٹیکنالوجی کے اس دور میں ریسرچ کی طرف دھیان دیں کیونکہ دنیا میں ترقی علم کے پھیلانے سے ملتی ہے، جو قوم سائنس اور ٹیکنالوجی پر عبور حاصل کرے گی دنیا اس کی محتاج ہوگی انہوں نے مزید کہا کہ ٹیکنالوجی کے اس دور میں ہم نے ریسرچ کے میدان میں مہارت حاصل کرنی ہے اور ہمیں نفرت اور تعصب کو چھوڑنا ہوگا یہ انسان کو تباہ کر دیتی ہے، انسان انسانیت کو بھول جاتا ہے۔ دنیا میں کامیاب وہ ہی ہوتا ہے جو مثبت سوچ رکھتا ہے۔
اس موقع پر وائس چانسلر
پروفیسر محمود ایاز نے اظہار خیال کرتے ہوئے کہا کہ ہم پروفیسر احسن اقبال کو کنگ ایڈورڈ میڈیکل یونیورسٹی آمد پر
خوش آمدید کہتے ہیں۔
پروفیسر احسن اقبال اپنے ضلع نارووال میں امن، تعلیم اور ترقی کے علمبردار ہیں۔ انہوں ضلع نارووال میں مثالی تعلیم دوست اقدامات اٹھائے یونیورسٹیوں کا قیام اور خاص طور پر نارووال میڈیکل کالج کا قیام کیا جس کی۔کلاسسز کا آغاز اسی سال سے ہو رہا ہے۔ انہوں نے کہا کہ میڈیکل کی تعلیم دوسری تعلیم سے مختلف ہے اور اس شعبے میں انتہائی محنت کی ضرورت ہوتی ہے آپ سب کی پہلی ترجیح آپ کے مریض ہونے چاہیے اور
آپ کا اصل مقصد مخلوق خدا کی خدمت ہونا چاہیے۔ انہوں نے کہا کہ دکھی انسانیت کی خدمت کا صلہ اللہ نے دینا ہے اور آپ آج جس مقام پر پہنچے ہیں اس کے پیچھے آپ کے والدین کی بے پناہ قربانیاں ہیں اگر
اسی تسلسل کے ساتھ والدین کی محنت رہی تو ایک دن آپ کو اعلٰی مقام حاصل ہو گا۔ کنگ ایڈورڈ میڈیکل یونیورسٹی میرٹ کے لحاظ سے پہلے نمبر پر ہے جو بھی آپ تعلیم حاصل کریں اس میں آپ کو ماہر ہونا چاہیے اور آپ وہ صلاحیتیں سیکھیں جس سے دنیا میں آپ کا نام ہو۔ انہوں نے مزید کہا کہ
آپ جہاں بھی جائیں مادرعلمی اور ملک پاکستان کی خدمت کریں۔آپ کی زندگی کا اصل مقصد دکھی انسانیت کی خدمت ہونا چاہیے۔ہیں لوگ جہاں میں اچھے آتے ہیں جو کام دوسروں کے۔
اس موقع پر بیسک سائنسز، کلینکل سائنسز کے سربراہان، چیف وارڈن نے اپنے اپنے شعبوں کا تعارف کروایا۔
وائس چانسلر پروفیسر محمود ایاز نے مہمان خصوصی پروفیسر احسن اقبال کو یونیورسٹی کی جانب سے یادگاری شیلڈز دی
جبکہ پرو وائس چانسلر نے تمام مہمانوں کا شکریہ ادا کیا ان کا کہنا تھا کہ 96 فیصد میرٹ حاصل کرنے پر طلبا و طالبات کو مبارکباد پیش کرتے ہیں اور ہم تمام شعبوں کے سربراہان طبی اداروں کے سربراہان، سابقہ پروفیسرز کا تشریف آوری پر مشکور ہیں۔

وفاقی وزیر منصوبہ بندی پروفیسر احسن اقبال اور وائس چانسلر پروفیسر محمود ایاز کی کنگ ایڈورڈ میڈیکل یونیورسٹی کے 165 ویں وائٹ کوٹ تقریب میں فیکلٹی ممبران اور سٹوڈنٹس کے ہمراہ گروپ فوٹو