ایک لاکھ 90ہزار افراد کو کھانا، ادویات مختلف ذرائع سے پہنچا چکے ہیں، مولانا عبدالحبیب عطاری
ہمارا مقصد غزہ وفلسطینی مسلمانوں کی مدد کرنا ہے ، وفد کے ہمراہ جورڈن کے وزیر اوقاف سے گفتگو
کراچی( اسٹاف رپورٹر) ایف جی آر ایف غزہ و فلسطینی مسلمانوں کی مدد کیلئے روز اول سے ہی پیش پیش ہے اور وقتا فوقتا پکا پکایا کھانا تقسیم کرکے اپنی خدمات کو اب تک جاری رکھے ہوئے ہے جبکہ ٹینکرز کے ذریعے پانی کی تقسیم کا سلسلہ بھی جاری ہے، ترجمان کے مطابق غزہ و فلسطینی مسلمانوں میں امداد ی کاموں کو مزید احسن انداز سے آگے پہنچانے کیلئے دعوت اسلامی کی مرکزی مجلس شوریٰ کے رکن مولانا عبدالحبیب عطاری نے وفد کے ہمراہ جورڈن میں وزارت اوقاف کے دفتر میں وزیر اوقاف اور دیگر آفیشلز حکام سے ملاقات کی۔ اپنے دورے کا مقصد بیان کرتےہوئے ان کا کہنا تھا کہ ہمارا مقصد غزہ وفلسطین کے مسلمانوں کی بھرپور انداز میں مدد کرنا ہے جیسا کہ شام و ترکیہ میں آنیوالے زلزلے کے بعد ایف جی آر ایف کی جانب سے متاثرین کیلئے کئے گئے اقدامات ہیں ، رکن شوریٰ نے بتایا کہ غزہ و فلسطینی مسلمانوں میں ایف جی آرایف کے تحت اب تک ایک لاکھ 90ہزار افراد کو تیار شدہ کھانا،میٹریس ، ادویات سمیت دیگر ضروری سامان مختلف ذرائع سے پہنچا چکے ہیں اور اس وقت بھی دو امدادی کنٹینر میں موجود باکس کی قیمت 40ڈالر یعنی پاکستانی 12ہزار روپے ہے،ایک باکس تقریباً پندرہ دن ایک فیملی کیلئے کفالت کرسکے گا ۔ مولانا عبدالحبیب عطاری نے وزیر اوقاف جورڈن و دیگر آفیشنلز کو ایف جی ایف آر کے غزہ و فلسطین میں امدادی کاموں پر بریفنگ دیتے ہوئے مستقبل میں یتیم بچوں کیلئے یتیم خانہ اور متاثرین کیلئے گھروں کی تعمیر سمیت دیگر فلاحی کاموں کے حوالے سے بھی تجاویز دیں ، ملاقات کے دوران وزیر اوقاف جورڈن نے غزہ و فلسطین سمیت بین الاقوامی سطح پر ایف جی آر ایف کی خدمات کو سراہا اور دی گئی تجاویز پر اپنے مکمل تعاون کی یقین دہانی کرائی۔ ترجمان نے امید ظاہر کی کہ رکن شوریٰ ،مولانا عبدالحبیب عطاری کی وزیر اوقاف جورڈن و دیگر آفیشنلز حکام سے ملاقات کےبعد امید ہے ایف جی آر ایف کی طرف سے غزہ و فلسطینی مسلمانوں کیلئے بڑے پیمانے پر فلاحی کاموں کاآغاز ہوگا۔
