شہر قائد کے علاقے صفورا چورنگی کے قریب ٹریفک حادثے میں ایک اور شہری کی قیمتی جان تلف ہو گئی، پولیس نے کار ڈرائیور کو گرفتار کر لیا۔
تفصیلات کے مطابق صفورا چورنگی کے قریب ٹریفک حادثے میں ایک نوجوان جاں بحق ہو گیا ہے، حادثہ ملیر کینٹ کے قریب سڑک پر رات گئے پیش آیا تھا، جس پر متوفی وسیم کے بھائی کی مدعیت میں مقدمہ درج کر لیا گیا ہے۔
سچل پولیس نے حادثے کے ذمہ دار کار ڈرائیور کو بھی گرفتار کر لیا ہے، ملزم عبدالرافع کو سچل تھانے منتقل کر دیا گیا، جس کی کار کی ٹکر سے موٹر سائیکل مکمل طور پر تباہ ہو گئی، اس حادثے کے نتیجے میں کار کو بھی شدید نقصان پہنچا۔
متوفی کے بھائی نے ایف آئی آر میں لکھوایا کہ اس کے بھائی کی موٹر سائیکل کو کار سوار نے ٹکر ماری، جس سے بھائی شدید زخمی ہوا، اور پھر زخموں کی تاب نہ لاتے ہوئے انتقال کر گیا۔
مدعی کے مطابق کار سوار عبدالرافع غفلت اور لاپرواہی سے تیز کار چلا رہا تھا، جس کے باعث جان لیوا حادثہ پیش آیا، اس لیے گرفتار ملزم کے خلاف قانونی کارروائی کی جائے۔
واضح رہے کہ کراچی میں ٹینکرز، ڈمپرز اور دیگر گاڑیوں کی غفلت کے باعث ٹریفک حادثات تشویش ناک حد تک بڑھ گئے ہیں، جس میں قیمتی انسانی جانیں تلف ہو رہی ہیں، جن کی روک تھام کے لیے انتظامیہ بھی متحرک ہو گئی ہے۔
===========================
حیدرآباد قومی شاہراہ سے وکلا کا دھرنا ختم، ٹریفک کی آمدورفت بحال
وکلا نے ایس ایس پی حیدرآباد کے تبادلے کی یقین دہانی پر قومی شاہراہ سے دھرنا ختم کردیا۔ جس کے بعد ٹریفک کی آمدو رفت بحال ہوگئی۔
اے آر وائی نیوز کے مطابق صدر ہائیکورٹ بار حیدرآباد ایاز تنیو کا اس حوالے سے کہنا تھا کہ سندھ حکومت نے ہمارے مطالبات مان لئے ہیں، ایس ایس پی حیدرآباد ڈاکٹر فرخ لنجار کو ہیڈ کوارٹرز رپورٹ کرنے کا حکم دے دیا گیا ہے۔
صدر ہائیکورٹ بار کا کہنا تھا کہ ایس ایس پی کے تبادلے کے بعد دھرنا ختم کرنے کا اعلان کرتے ہیں۔
واضح رہے کہ وکیل کیخلاف ایف آئی آر درج کرنے پر حیدرآباد میں وکلا اور پولیس کے درمیان کشیدگی میں اضافہ ہو گیا تھا، جس کے بعد وکلاء نے حیدرآباد بائی پاس پر دھرنا دے دیا تھا۔
وکلا نے عدالتی کارروائیوں کا بائیکاٹ جاری رکھا جب کہ شدید سردی کے باوجود قومی شاہراہ پر دھرنا دیے بیٹھے رہے، دھرنے کے باعث کراچی سے اندرون ملک آنے اور جانے والی ٹریفک معطل اور ہزاروں گاڑیاں پھنس کر رہ گئی تھیں۔
ڈسٹرکٹ باراور ہائی کورٹ بار نے جوڈیشل انکوائری کی پیشکش کو مسترد کر دیا تھا اور صدر ڈسٹرکٹ بار فیصل مغل کا کہنا تھا کہ سندھ پولیس کی پریس ریلیز کا ہمیں علم نہیں، ہمارا صرف ایک ہی مطالبہ ہے کہ ایس ایس پی حیدرآباد فرخ لنجار کا تبادلہ کیا جائے۔
کراچی: گٹکا مافیا سے رشوت مانگنے والا ایس ایچ او شاہ لطیف معطل
ٹنڈوالہیار میں بھی وکلا نے حیدرآباد کے وکلاء کی حمایت میں کیریا شاخ کے مقام پر دھرنا دے دیا تھا، اس دھرنے کے باعث میرپورخاص حیدرآباد شاہراہ بند ہو گئی تھی اور شاہراہ پر گاڑیوں کی لمبی قطاریں لگ گئی تھیں۔
