ہمدرد فائونڈیشن پاکستان کی صدر محترمہ سعدیہ راشد,ٹیم کراچی کےبورڈ ممبر محمود ارشد ایک شخص کو روزگار رکشہ کی چابی دے رہے ہیں۔اس موقع پر ٹیم کراچی کے صدر ثاقب ذیشان، ہمدرد پاکستان کے چیف آپریٹنگ آفیسر فیصل ندیم ، گروپ ڈائریکٹر ابوطالب بھٹو اور ڈائریکٹر سید محمد ارسلان بھی موجود ہیں۔
==============
ہمدرد فائونڈیشن پاکستان کے تعاون سے ٹیم کراچی ویلفیئر سوسائٹی کے زیر اہتمام ’’خود کفالت روزگار پراجیکٹ‘‘ کے تحت ٹیم کراچی سلائی سینٹر سے 155فارغ التحصیل 71مرد اور 84خواتین کو سلائی مشینوں اور اسناد کی تقسیم کی پروقار تقریب مورخہ 26جنوری 2025ء کوکورنگی کے مقامی ہال میں منعقد کی گئی۔ہمدرد فائونڈیشن پاکستان کی صدر محترمہ سعدیہ راشد نے جو کہ تقریب کی مہمان خصوصی تھیں کے ساتھ ہمدرد پاکستان کے چیف آپریٹنگ آفیسر فیصل ندیم صاحب، گروپ ڈائریکٹر ابوطالب بھٹو صاحب اور ڈائریکٹر سید محمد ارسلان صاحب نے شرکت کی ۔ محترمہ سعدیہ راشد نے ہنر مندی کا کورس مکمل کرنے والے افراد میں اسناد تقسیم کیں۔ تقریب کے دوران ضرورت مند افراد کو ہمدرد فائونڈیشن پاکستان کے تعاون سے 10روزگار رکشے اور 5 لوڈر رکشے بھی دئیے گئے۔ اس موقع پر محترمہ سعدیہ راشد نے تقریب سے خطاب کر تے ہوے کہا کہ نوجوانان شہر نے اپنے ہم وطنوں کے حالات اپنی مدد آپ کے تحت بدلنے کا جو تہیہ کیا ہے اورجس احساس ذمے داری سے سماجی خدمات میں مصروف ہیں ،ان کی خلوص نیت اور جذبہ خدمت انسانیت یقیناً قابل ستایش بھی ہے اور قابل تقلید بھی۔ہمدرد فائونڈیشن پاکستان کا مطمع نظر ملّت کے نوجوانوںکو ہنرمند اور خود کفیل بنانا ہے۔انسان کا مستغنی ہونایعنی صرف اللہ کا محتاج ہونا بھی رب کائنات کی اُس پررحمت کا واضح عندیہ ہےجو ہنر مند انسان کو حاصل ہوجاتی ہے اور وہ خود کفیل ہوکر دوسروں کی محتاجی سے نکل جاتا ہے ۔اسی لیے ہمدرد فائونڈیشن پاکستان کی جانب سے مدینۃ الحکمہ کے اطراف کےگائوں گوٹھ کے بچوں کوہمدرد ولیج اسکول میں تعلیم و تربیت کے ساتھ ووکیشنل ٹریننگ بھی دی جاتی ہے۔ فنی تربیت انسان میں تخیلاتی و تخلیقی صلاحیتوںکو جلا بخشتی ہیں، اس کی اُجرت بھی بابرکت ہوتی ہے۔ انسان کی زندگی میں نشیب و فراز آتے ہیں۔ لیکن اگر انسان باصلاحیت اور تربیت یافتہ ہو تو وہ حالات کا ڈٹ کر مقابلہ کرلیتا ہے۔ چیف آپریٹنگ آفیسر فیصل ندیم صاحب نے کہاکہ محترمہ سعدیہ راشد کے وژن ’’صحت مند ہنر مند پاکستان‘‘ کے مطابق ہمدرد فائونڈیشن پاکستان خدمت خلق کے میدانو ں میں خلوص نیت سے مصروف عمل ہے۔۔ ٹیم کراچی کے منتظمین جس جانفشانی اور خلوص سے ملک کی خدمت کررہے ہیں یہ ہم سب کے لیے باعث افتخار ہے۔ میں دعاگو ہوں کہ ٹیم کراچی اسی طرح اپنے مقاصد میں کامیاب ہوتی رہے۔ سید محمد ارسلان صاحب نےہمدرد فائونڈیشن پاکستان کی جانب سے لیے جانے والے مختلف اقدامات پر روشنی ڈالی اور شرکاء محفل کو بتایا کہ ہمدرد فائونڈیشن کی جانب سے تعلیم و ہنر مندی کے کئی پروگرامز جاری ہیں جن سے شرکاء بھی مستفید ہوسکتے ہیں۔ ان پروگرامز میں حال ہی میں برلٹس انسٹی ٹیوٹ کے اشتراک سے نیا پروگرام قابل ذکر ہے جس کے تحت نہ صرف طلبہ کو کورسز سکھائے جاتے ہیں بلکہ بعد از کورس انڈسٹری شراکت داروں کے تعاون سے اُن کے معقول روزگار کا بندوبست بھی کیا جاتا ہے۔ ٹیم کراچی کے صدر ثاقب ذیشان نے بتایا کہ طلبہ کو سلائی سینٹر سے ملنے والی تربیت اور سند روزگار کے حصول میں بھی معاون ثابت ہوگی۔اُنھوں نے مزید کہاکہ سلائی مشینیں دینے کا مقصد طلبہ کو اپنے لیے مواقع پیداکرنے کی حوصلہ افزائی کرنا ہے۔ کئی زیر تربیت طلبہ نے بہت اچھی کارکردگی کا مظاہرہ کیا۔ٹیم کراچی کے نائب صدر ذی شان الرب جعفری صاحب، بورڈ ممبر محمود ارشد صاحب اور بورڈ ممبر مفتی شاکر صدیقی نے محترمہ سعدیہ راشد کی بہ طور مہمان خصوصی شرکت اور ہمدرد کے دیگر عہدیداران کی آمد پر اظہار تشکر کیا اور ہمدرد فائونڈیشن پاکستان کی مسلسل حمایت اور تعاون کو سراہا۔اُنھوں نے کہا آج کی یہ اہم سماجی خدمت ہمدرد فائونڈیشن پاکستان کے تعاون کے بغیر ممکن نہ تھی۔ اللہ پاک ہمدرد پاکستان کو ترقی و کامرانی کے سفر پر قایم رکھے ۔ آمین!
