فیصل آباد: پولیس اہلکاروں اور ان کے خاندانوں کے لیے ایک خوش آئند خبر۔ فیصل آباد پولیس لائن میں ایک اہم معاہدہ طے پایا ہے، جس کے تحت پولیس اہلکاروں اور ان کے اہل خانہ کو ڈائیلاسز جیسے مہنگے علاج کی مفت سہولت فراہم کی جائے گی۔ اس معاہدے پر سی پی او فیصل آباد کامران عادل اور رینل کیئر فاؤنڈیشن کے پراجیکٹ ڈائرئکٹر واجد شفیع نے دستخط کیے۔
اس معاہدے کے تحت فیصل آباد پولیس کے حاضر سروس اہلکاروں کے ساتھ ساتھ شہداء پولیس کے اہل خانہ کو بھی ڈائیلاسز کی مفت سہولت فراہم کی جائے گی۔ گردوں کے مرض میں مبتلا پولیس اہلکاروں کے لیے یہ ایک بڑا ریلیف ہے کیونکہ ڈائیلاسز ایک طویل اور مہنگا علاج ہے، جس کے اخراجات عام فرد کے لیے برداشت کرنا مشکل ہوتا ہے۔
سی پی او فیصل آباد کامران عادل کا کہنا تھا کہ پولیس فورس کے اہلکاروں کی صحت اور فلاح و بہبود ہمیشہ ان کی اولین ترجیح رہی ہے۔ انہوں نے کہا کہ پولیس جوان دن رات عوام کی خدمت میں مصروف رہتے ہیں، اور ان کی صحت کا خیال رکھنا ہماری ذمہ داری ہے۔ “یہ معاہدہ ہماری فورس کے اہلکاروں اور ان کے خاندانوں کے لیے ایک بڑی سہولت ثابت ہوگا۔ ہم چاہتے ہیں کہ ہمارے جوان بغیر کسی پریشانی کے اپنی ڈیوٹی انجام دیں اور اگر وہ یا ان کے اہل خانہ کسی بیماری کا شکار ہوں تو انہیں بہترین طبی سہولیات میسر ہوں۔”
رینل کیئر فاؤنڈیشن عرصہ دراز سے گردوں کے مریضوں کے لیے علاج کی سہولیات فراہم کر رہی ہے۔ فاؤنڈیشن کے نمائندوں کا کہنا تھا کہ پولیس اہلکار دن رات عوام کی خدمت میں مصروف رہتے ہیں اور ان کے لیے صحت کی بہترین سہولیات فراہم کرنا ہمارا قومی فرض ہے۔
رینل کئیر فاؤنڈیشن لاہور، گوجرانوالا اور فیصل آباد میں قائم سنٹرز کے زریعے ہزاروں مستحق مریضوں کو مفت ڈائلسز کی سہولت فراہم کر رہی ہے جس کا دائرہ کار دیگر شہروں تک بڑھایا جا رہا ہے۔
