کراچی(اسٹاف رپورٹر) انسداد دہشتگردی کی خصوصی عدالت نے شارٹ ٹرم کڈنیپنگ اور شہری سے 9 کروڑ روپے سے زائد مالیت کی ڈیجیٹل کرنسی لوٹنے کے مقدمے میں ملزمان کے جسمانی ریمانڈ میں توسیع کردی۔ کراچی میں انسداد دہشتگردی کی خصوصی عدالت کے روبرو اے وی سی سی نے گرفتار پولیس اہلکاروں سمیت 8 ملزمان کو ریمانڈ مکمل ہونے پر پیش کیا۔ مدعی کے وکیل نے موقف اختیار کیا کہ ملزمان سے پورے پیسے اب تک ریکور نہیں ہوئے۔ تفتیشی افسر نے عدالت کو بتایا کہ کیس کی تحقیقات تاحال مکمل نہیں ہوئی ہیں، استدعا ہے کہ ملزمان کے جسمانی ریمانڈ میں توسیع کی جائے۔ عدالت نے ملزمان کے جسمانی ریمانڈ میں مزید 2 دن کی توسیع کردی۔ پولیس کے مطابق کیس میں گرفتار 2 ملزمان طارق اور رضوان کو مدعی مقدمہ شناخت کرچکا ہے، ملزمان پر شہری کی شارٹ ٹرم کڈنیپنگ اور 9 کروڑ روپے سے زائد کی رقم لوٹنے کا الزام ہے۔
