صوبائی محتسب سندھ اور ہینڈز ویلفیئر فاؤنڈیشن کے درمیان مفاہمتی یاداشت پر اتفاق
ڈی جی صوبائی محتسب سندھ نسیم الدین میرانی اور سی ای او ہینڈز مقبول احمد نے معاہدے پر دستخط کیے
معاہدے کے تحت عوام کو بہتر و مفت انصاف کی فراہمی کے لیے مشترکہ لائحہ عمل تیار کرنا ہے
کراچی19نومبر۔صوبائی محتسب سندھ اور ہینڈز ویلفیئر فاؤنڈیشن کے درمیان مفاہمتی یاداشت پر دستخطی تقریب صوبائی محتسب سندھ صدر دفتر میں منعقد ہوئی۔ تقریب میں چیئرمین ہینڈز شیخ تنویر احمد نے سی ای او مقبول احمد اور چیف ایگزیکٹو سروسز محمد انیس کے ہمراہ تقریب میں شرکت کی۔ تقریب میں ڈائریکٹر جنرل صوبائی محتسب سندھ نسیم الدین میرانی اور سی ای او ہینڈز مقبول احمد نے معاہدے پر دستخط کیے۔ معاہدے کے تحت عوام کو بہتر و مفت انصاف کی فراہمی کے لیے مشترکہ لائحہ عمل تیار کرنا ہے۔ قبل ازیں محمد سہیل راجپوت نے ہینڈز ویلفیئر فاؤنڈیشن کے وفد کو صوبائی محتسب سندھ سے متعلق تفصیلی بریفنگ دیتے ہوئے کہا کہ صوبائی محتسب سندھ کی بنیادی ذمہ داری سرکاری محکموں سے متعلق عوامی شکایات کا ازالہ ہے جس کے مؤثر حل کے لیے اگلے ماہ کمپلینٹ مینجمنٹ سسٹم لانچ کررہے ہیں۔ انھوں نے کہا کہ جدید شکایتی نظام عوامی شکایات کے فوری حل میں مددگار اور سنگ میل ثابت ہوگا۔ اس موقع پر چیئرمین شیخ تنویر احمد نے ہینڈز ویلفیئر فاؤنڈیشن کے بارے میں تفصیلی بریفنگ دی۔ انھوں نے کہا کہ محمد سہیل راجپوت کی سربراہی میں صوبائی محتسب سندھ عوامی شکایات کے ازالے کے لیے گرانقدر خدمات انجام دے رہا ہے، سندھ میں گڈ گورننس کو فروغ دینے کے لیے دونوں ادارے مشترکہ اقدامات کریں گے۔ تقریب میں سیکریٹری منصور عباس رضوی، رجسٹرار مسعود عشرت، ایڈوائزر ریحانہ جی علی میمن، ڈائریکٹر کوآرڈینیشن امداد حسین صدیقی، کنسلٹنٹ آئی ٹی اکمل نسیم و دیگر بھی موجود تھے۔
