اسلام آباد: ڈی جی آئی ایس پی آر لیفٹیننٹ جنرل احمد شریف چوہدری نے قائد اعظم یونیورسٹی اسلام آباد کا دورہ کیا اور اساتذہ و طلباء کے ساتھ خصوصی نشست میں شرکت کی۔ قائد اعظم یونیورسٹی میں ڈی جی آئی ایس پی آر کی آمد کو اساتذہ اور طلباء نے بھرپور سراہا۔
نشست کے دوران ڈی جی آئی ایس پی آر نے داخلی صورتحال، ملکی دفاع اور پاک فوج کے پیشہ وارانہ کردار پر روشنی ڈالی۔ انہوں نے طلباء کو سوشل میڈیا پر جاری پروپیگنڈا اور اصل حقائق سے متعلق آگاہ کیا۔
وائس چانسلر قائد اعظم یونیورسٹی نے ڈی جی آئی ایس پی آر کو سراہتے ہوئے کہا کہ بھارت کے حوالے سے ڈی جی آئی ایس پی آر نے کہا تھا کہ ہمارے جواب کو دنیا دیکھے گی اور دنیا نے مسلح افواج کے جواب کو بخوبی دیکھا۔ افواج پاکستان نے صرف بھارت اور اس کی فوج بلکہ ان کی ٹیکنالوجی کو بھی شکست دی۔
خصوصی نشست میں موجود طلباء اور اساتذہ نے کہا کہ ڈی جی آئی ایس پی آر کے ساتھ خصوصی نشست نے بہت سے طلباء کے ابہام کو مکمل طور پر بدل دیا۔ اساتذہ نے کہا کہ ہم پنجابی، پٹھان، سندھی یا بلوچی نہیں بلکہ سب سے پہلے پاکستانی ہیں۔ آج کا سیشن بہت مؤثر تھا، جس سے طلباء کو بہت کچھ سیکھنے کو ملا۔
نشست میں پاکستان کے ہر ضلع اور تحصیل سے طلباء شریک تھے۔ ڈی جی آئی ایس پی آر نے مس انفارمیشن پر طلباء کے سوالات کے مدلل جوابات دیے۔ طلباء نے کہا کہ ہم پاکستانی ہیں اور پاک آرمی ہم میں سے ہے۔ ہم پاکستان کی مسلح افواج کے ساتھ کھڑے ہیں اور انہیں سلام پیش کرتے ہیں۔
