وزیراعلیٰ پنجاب مریم نواز کا کہنا ہے کہ اگراللہ نے پنجاب کو پہلی خاتون وزیراعلیٰ دی ہے تو صوبے کی بیٹی، بہن، ماں جب تک اپنے آپ کو محفوظ تصور نہیں کرے گی مریم نواز آرام سے نہیں بیٹھے گی، خواتین کو مکمل تحفظ دینے تک آرام سے نہیں بیٹھوں گی۔ راولپنڈی میں تقریب سے خطاب کرتے ہوئے انہوں نے کہا کہ ن لیگ آتی ہے تو ملک ترقی کرنے لگ جاتا ہے، کوئی مانے یا نہ مانے، کام کرنا آتا ہے تو ن لیگ کو آتا ہے، اسی لیے جب نوازشریف کی حکومت آتی ہے تو مُلک ترقی کرنے لگتا ہے، نواز شریف کو جب ہٹایا جاتا ہے تو مُلک تنزلی کی طرف جانے لگتا ہے، مخالفین بھی کہتے ہیں کام کرتی ہے تو ن لیگ کرتی ہے، لوگوں نے سیاست میں کئی سال ضائع کیے، ان کا نام لو تو بدتمیزی، بد تہذیبی، ڈنڈا مار، کٹائی ذہنوں میں آتا ہے۔
وزیراعلیٰ پنجاب نے کہا کہ راولپنڈی میں صفائی ستھرائی نظام دیکھ کر خوشی ہوئی، راولپنڈی میں دن رات ترقیاتی کام ہورہے ہیں، راولپنڈی آج بہت خوبصورت لگ رہا ہے، کام کرنا آتا ہے تو مسلم لیگ ن کو آتاہے، مری میں جتنے کام بھی ہوئے شریف برادران نے کرائے ، یہ وہی ملک ہے جس کی کچھ عرصہ قبل ڈیفالٹ کی بتائیں ہورہی تھیں، مخالفین کو آتا ہے تو صرف فتنہ فساد پھیلانا، ہمارے مخالفین بھی ڈیفالٹ کے انتظار میں تھے، آج اُن لوگوں کو شدید مایوسی ہوئی جو ملک کو دیوالیہ ہوتا دیکھنا چاہتے تھے کیوں کہ مسلم لیگ ن نے میگا پراجیکٹ شروع کیے، آپ کے پاس یہ سڑکیں ہیں تو اُن پر بسیں چل رہی ہیں، آپ نے جہاں بھی جانا ہوتاہے تو 20 روپے سے زیادہ کرایہ نہیں ہے، الیکٹرک بسوں کا کرایہ بھی زیادہ نہیں ہے یہ بزرگوں کیلئے مفت ہے۔
