سسٹم کے اندر خطرناک لڑائی!!! محاذ کی قیادت کون کرے گا؟ | امداد سومرو
سسٹم کے اندر خطرناک لڑائی!!! محاذ کی قیادت کون کرے گا؟ | امداد سومرو
Dangerous Fight Inside the System!!! Who will Lead the Front?? | Imdad Soomro
=================
28ویں آئینی ترمیم میں بلدیاتی نظام سے متعلق ترامیم شامل کی جائیں گی، مصطفیٰ کمال
وفاقی وزیر صحت مصطفیٰ کمال نے دعویٰ کیا ہے کہ آئندہ چند ماہ میں ایک اور آئینی ترمیم متوقع ہے جس میں بلدیاتی حکومتوں سے متعلق تبدیلیاں آئینی ترمیم میں شامل کی جائیں گی جس کا مطالبہ ایم کیو ایم پاکستان کرتی آئی ہے۔
27ویں آئینی ترمیم کے نافذ ہونے کے بعد کراچی میں پریس کانفرنس کے دوران مصطفیٰ کمال نے آئین کے آرٹیکل 140 اے کا ذکر کیا، جو مقامی حکومتوں سے متعلق ہے۔
ان کا کہنا تھا کہ ایم کیو ایم پاکستان کی جانب سے اس آرٹیکل میں مجوزہ ترامیم کا معاملہ ابھی ختم نہیں ہوا بلکہ انہیں 28ویں آئینی ترمیم کا حصہ بنا کر زیرِ بحث لایا جائے گا۔
انہوں نے کہا کہ یہ تبدیلیاں ابتدا میں 26ویں آئینی ترمیم میں شامل کرنے کی تجویز دی گئی تھیں، جو گزشتہ سال اکتوبر میں ایک رات میں طویل اجلاس کے ذریعے پارلیمنٹ سے منظور کی گئی تھی۔
وفاقی وزیر کا کہنا تھا کہ یہ مجوزہ تبدیلیاں اس وقت پارلیمانی قائمہ کمیٹی برائے قانون و انصاف کے اجلاسوں میں بھی زیرِ بحث آئیں، تاہم حکومت نے اس وقت یہ کہہ کر اپنی عدمِ استطاعت ظاہر کی کہ وہ ان ترامیم کے لیے مطلوبہ حمایت حاصل نہیں کر سکتیں۔
اس لیے انہوں نے ایم کیو ایم پاکستان سے درخواست کی کہ معاملہ اگلی آئینی ترمیم تک مؤخر کیا جائے۔
مصطفیٰ کمال نے مزید کہا کہ چنانچہ ہمارا بل ایک سال تک قائمہ کمیٹی برائے قانون و انصاف میں پڑا رہا اور پھر 27ویں آئینی ترمیم کا وقت آگیا۔
ان کا کہنا تھا کہ اگر ایم کیو ایم چاہتی تو 27ویں آئینی ترمیم کے اعلان سے قبل، حکومت کی جانب سے آئینی تبدیلی کا فیصلہ سامنے آنے پر وہ حکومت سے مزید وزارتیں، ترقیاتی پیکیج کے نام پر وسائل، یا مراعات و خصوصی اختیارات کا مطالبہ بھی کر سکتی تھی۔
==============================
سندھ کی تقسیم ناممکن ہے، سندھ کوئی کیک نہیں کہ اس کو بانٹ دیا جائے: شرجیل میمن
سینئر وزیرسندھ شرجیل انعام میمن کا کہنا ہےکہ سندھ کی تقسیم مشکل نہیں نا ممکن ہے ، سندھ کوئی کیک نہیں ہےکہ اس کو بانٹ دیا جائے۔
کراچی میں پریس کانفرنس کرتے ہوئے شرجیل میمن کا کہنا تھا کہ صوبہ توڑنے کی باتیں فضول ہیں، سندھ کی تقسیم ممکن نہیں ہے، 27 ویں ترمیم کے ایجنڈے میں بلدیات کا ذکر تھا ہی نہیں، بلاول بھٹو زرداری نے ٹویٹ میں 27 ویں ترمیم کے نکات بیان کیے۔
ایم کیو ایم رہنما مصطفیٰ کمال کو جواب دیتے ہوئے شرجیل میمن کا کہنا تھا کہ بانی ایم کیو ایم کے پیروکار ان کی طرح ملک کو توڑنے کی باتیں کریں گے، متحدہ اپنی مردہ سیاست میں جان ڈالنا چاہتی ہے، ایم کیو ایم چاہتی ہےکہ ہم جذباتی جواب دیں اور وہ سیاست کریں ، وہ ہر وقت اقتدار میں رہنا چاہتے ہیں۔
پی پی نے بلدیاتی نظام پر بات نہ کی تو 18ویں ترمیم ختم ہوگی اور سندھ میں صوبہ بھی بنے گا، مصطفیٰ کمال
شرجیل میمن کا کہنا تھا کہ ایم کیو ایم کی باتیں ایک کان سے سنیں دوسرے سے نکال دیں، ایم کیو ایم کی سیاست کے تمام ہتھکنڈے ختم ہوچکے، ایم کیو ایم مثبت سیاست کرے ہم ان کے ساتھ ہیں۔
ان کا کہنا تھا کہ یہ جن بلدیاتی انتخابات کا ذکر کر رہے ہیں، انہوں نے زمینی حقائق دیکھ کر بائیکاٹ کیا، انہیں پتا تھا بلدیاتی انتخاب لڑیں گے تو شکست ہوگی۔
شرجیل میمن کا مزید کہنا تھا کہ آئینی عدالتوں کا ذکر میثاق جمہوریت میں بھی تھا،کوئی مقدس گائے نہیں ہے، پیپلزپارٹی نےکوئی شق چھپ کر تسلیم نہیں کی۔
=====================
وزیر اعظم شہباز شریف کا کراچی سرکلر ریلوے کی جلد بحالی کا اعلان
وزیر اعظم شہباز شریف نے کراچی سرکلر ریلوے کی جلد بحالی کا اعلان کر دیا۔
وزیر اعظم شہباز شریف نے کراچی کینٹ اسٹیشن کی اپ گریڈیشن کے افتتاح کی تقریب سے خطاب میں کہا کہ کراچی سرکلر ریلوے شہر کی ضرورت ہے اس بارے میں ہر جگہ بات کی ہے۔
وزیر اعظم نے کہا کہ تہران سے استنبول کے روٹ کو بحال کریں گے تو پاکستان ریلوے کو چار چاند لگ جائیں گے ۔ شالیمار ایکسپریس کو مکمل طور پر نئی ٹرین بنا دیا گیا ہے، محکمہ ریلوے نے کراچی کینٹ کو مہارت سے بحال کیا ہے۔
وزیراعظم شہباز شریف کا کہنا تھا کہ محکمہ ریلوے نے شالیمار کو آؤٹ سورسنگ سے نیا بنادیا ہے، شالیمار ٹرین کی صفائی کراچی ویسٹ مینجمنٹ کی ذمہ داری ہے۔
انہوں نے کہا کہ تھرکول کو ٹرانسپورٹ کرنے کیلئے وفاق اور سندھ حکومت کا اشتراک ہے، یہاں ریلوے ایک بوسیدہ نظام بن گیا ہے، حنیف عباسی نے اپنی ٹیم کے ساتھ مل کر اس بوسیدہ نظام کو جدید کیا، میں حنیف عباسی کو دل کی گہرائیوں سے مبارکباد دیتا ہوں۔
واضح رہے کہ پیر کو وزیراعظم شہباز شریف نے کراچی کینٹ اسٹیشن کا دورہ کیا ۔اس موقع پر وزیر ریلوے حنیف عباسی نے وزیر اعظم کو بریفنگ دی۔
بعد ازاں وزیراعظم شہبازشریف نے شالیمار ایکسپریس کی اپ گریڈیشن کے بعد افتتاح بھی کیا۔
