اسلام آباد: شاہِ اردن عبداللہ دوم نے گلوبل انڈسٹریل اینڈ ڈیفنس سلوشنز کا دورہ کیا جہاں اردن کے اعلیٰ سول و عسکری حکام بھی ان کے ہمراہ تھے۔ آذربائیجان کے وزیرِ دفاعی صنعت بھی معزز مہمانوں میں شامل تھے۔ فیلڈ مارشل عاصم منیر نے شاہ عبداللہ دوم اور دیگر معزز مہمانوں کا پرتپاک استقبال کیا۔
آئی ایس پی آر کے مطابق شاہ عبداللہ دوم کو گلوبل انڈسٹریل اینڈ ڈیفنس سلوشنز کے مختلف شعبوں، تیاریاں، صلاحیتوں اور ٹیکنالوجی سے متعلق تفصیلی بریفنگ دی گئی۔ شاہ عبداللہ دوم نے ادارے کی تربیت، پیشہ ورانہ مہارت اور آپریشنل صلاحیتوں کے اعلیٰ معیار کو سراہا۔ شاہِ اردن نے ٹلہ فیلڈ فائرنگ رینجز کا بھی دورہ کیا اور معزز مہمانوں نے مشترکہ مشق کا مشاہدہ کیا۔
وزیراعظم شہباز شریف بھی اس موقع پر موجود تھے۔ انہوں نے شاہِ اردن اور اردن کے عوام کے لیے گہرے احترام اور محبت کا اظہار کیا۔ فیلڈ مارشل عاصم منیر نے پاکستان اور اردن کے درمیان دفاعی شعبے میں تعاون کو مزید فروغ دینے کے عزم کا اعادہ کیا۔
شاہِ اردن کی جانب سے فیلڈ مارشل عاصم منیر کو آرڈر آف دی ملٹری میرٹ فرسٹ ڈگری کا اعزاز بھی دیا گیا۔ یہ اعزاز پاکستان اور اردن کے درمیان دفاعی تعاون کو مضبوط بنانے میں ان کی شاندار خدمات کے اعتراف میں پیش کیا گیا۔
