ملک میں چینی کی زیادہ سے زیادہ فی کلو قیمت 229 روپے تک جا پہنچی، کوئٹہ کے شہری ملک میں سب سے مہنگی چینی خریدنے پر مجبور ہیں۔
وفاقی ادارہ شماریات کی جانب سے جاری تازہ اعداد و شمار کے مطابق کوئٹہ میں چینی کی فی کلو قیمت 210 روپےسے بڑھ کر 229 روپے تک پہنچ گئی۔
وفاقی ادارہ شماریات کی رپورٹ کے مطابق گزشتہ ایک ہفتےمیں کوئٹہ میں چینی کی فی کلو قیمت میں 19 روپےتک کا اضافہ ہوا، پشاور میں چینی کی زیادہ سے زیادہ فی کلو قیمت 200 روپے جبکہ کراچی اوراسلام آباد میں چینی کی زیادہ سے زیادہ فی کلوقیمت 195 روپے تک ہے۔
راولپنڈی میں چینی کی زیادہ سےزیادہ فی کلو قیمت 190 روپے تک ہے، رپورٹ کے مطابق گزشتہ ایک ہفتےمیں چینی کی اوسط فی کلو قیمت میں دو روپے ایک پیسے کی کمی ہوئی جس کے بعد ملک میں چینی کی اوسط فی کلو قیمت 185 روپے 47 پیسے پرآگئی ہے۔
گذشتہ ہفتےتک ملک میں چینی کی اوسط فی کلو قیمت 187 روپے 48 پیسے تھی جبکہ ایک سال قبل ملک میں چینی کی اوسط فی کلو قیمت 132 روپے 24 پیسے تھی۔
=====================
نائب وزیراعظم کی زیرصدارت اعلیٰ سطحی بین الوزارتی اجلاس ، دوست ممالک کے ساتھ سرمایہ کاری کے مواقع پر زور
اسلام آباد:نائب وزیراعظم و وزیرِخارجہ سینیٹر محمد اسحاق ڈار نے دوست ممالک بشمول آذربائیجان کے ساتھ سرمایہ کاری کے منصوبوں اور تجاویز پر پیش رفت کا جائزہ لینے کے لیے اعلیٰ سطحی بین الوزارتی اجلاس کی صدارت کی۔
اجلاس میں معاون خصوصی طارق باجوہ، وزارتِ خارجہ، وزارتِ تجارت، وزارتِ مواصلات، وزارتِ انسانی وسائل کے ایڈیشنل سیکرٹریز، آذربائیجان میں پاکستان کے سفیر اور متعلقہ وزارتوں کے دیگر سینئر اہلکار شریک ہوئے۔
اجلاس میں بنیادی ڈھانچے، توانائی، پٹرولیم، تجارت اور آئی ٹی سروسز میں بیرونی سرمایہ کاری کے مواقع پر توجہ مرکوز کی گئی۔ نائب وزیراعظم نے کہا کہ پاکستان کے اقتصادی اور سرمایہ کاری تعلقات کو مضبوط بنانا، خاص طور پر آذربائیجان جیسے شراکت دار ممالک کے ساتھ، حکومت کی اولین ترجیحات میں شامل ہے اور ان منصوبوں کو پائیدار ترقی اور خوشحالی میں تبدیل کرنے کے لیے بھرپور اقدامات کیے جائیں گے۔
