کراچی 08نومبر ۔محکمہ انسانی حقوق حکومتِ سندھ کے ڈائریکٹر آغا فخر حسین نے اپنے دفتر میں دعوتِ اسلامی کے وفد سے ایک اہم ملاقات کی۔ وفد کی قیادت مولانا حنیف قادری نے کی۔ ملاقات کا مقصد سندھ بھر میں اسلامی اور عالمی انسانی حقوق کے حوالے سے آگاہی کے فروغ میں باہمی تعاون کو مضبوط بنانا تھا۔ملاقات میں اسلامی اصولوں جیسے رحم دلی، انصاف اور مساوات کو عالمی انسانی حقوق کے معیارات کے ساتھ ہم آہنگ کرنے پر گفتگو کی گئی۔ اس حوالے سے عالمی ادارۂ صحت (WHO) اور شراکت دار اداروں کی جانب سے تیار کردہ INSPIRE کے سات حکمتِ عملیاں برائے انسدادِ تشدد بر خلافِ اطفال کی رہنما دستاویز بھی وفد کے اراکین کے ساتھ شیئر کی گئی تاکہ اس کے تفصیلی مطالعے کے بعد آئندہ کی حکمت عملی طے کی جائے۔ وفد کے اراکین نے محکمہ انسانی حقوق کی جانب سے عالمی اور انسانی اقدار کے فروغ کے لیے کی جانے والی کوششوں کو سراہا۔ وفد نے کہا کہ اسلام کے بنیادی اصول جیسے امن، اخلاق، مہربانی اور انسانی وقار کا احترام، دراصل انہی عالمی انسانی حقوق کے مقاصد سے ہم آہنگ ہیں۔ وفد نے محکمہ کی مذہبی و سماجی اداروں کے ساتھ روابط کو مثبت قرار دیتے ہوئے آگاہی سرگرمیوں اور کمیونٹی پروگرامز میں مکمل تعاون کی یقین دہانی کرائی۔دونوں فریقین نے اس بات پر اتفاق کیا کہ مدارس اور مقامی برادریوں میں انسانی حقوق کی تعلیم اور شعور اجاگر کرنے کے لیے خطباتِ جمعہ، تعلیمی نشستیں، اور تربیتی ورکشاپس کا انعقاد کیا جائے گا جن میں انسانی وقار، مساوات اور عدمِ تشدد جیسے موضوعات کو اسلامی تعلیمات اور عالمی اصولوں کی روشنی میں واضح کیا جائے گا۔ دونوں فریقین کے درمیان یہ بھی طے پایا کہ جلد ایک فالو اپ اجلاس منعقد کیا جائے گا جس میں سندھ بھر میں مشترکہ آگاہی مہم خصوصاً بچوں کے تحفظ، تعلیم کے فروغ اور انسانی اقدار کی پاسداری کے حوالے سے حتمی طریقہ کار طے کیا جائے گا ۔ ڈائریکٹر انسانی حقوق سندھ آغا فخر حسین نے دعوت اسلامی کے اراکین کا شکریہ ادا کیا اور صوبے میں انسانی حقوق کے تحفظ کے لئے اپنے ہر ممکن تعاون کا یقین دلایا ۔
