رپورٹ محمد عاشق پٹھان خسرہ اور او پی وی ویکسینیشن مہم کے حوالے سے کمشنر لاڑکانہ ڈویژن طاہر حسین سانگی کی زیر صدارت کمشنر آفس میں اجلاس ہوا، اجلاس کو بریفنگ دیتے ہوئے ڈاکٹر شاہد حسین کھوکھر، ڈویژنل آفیسر ای پی آئی لاڑکانہ نے بتایا کہ یہ مہم 17 نومبر سے 29 نومبر تک جاری رہے گی، جس میں چھ ماہ سے پانچ سال تک کی عمر کے بچوں کو ویکسین دی جائے گی، انہوں نے کہا کہ یہ اجلاس صوبائی سطح پر منعقدہ جائزہ اجلاس کا تسلسل ہے، مائیکرو پلان تیار کر کے نافذ کر دیا گیا ہے اور ٹیموں کی تربیت بھی مکمل ہو چکی ہے، ڈاکٹر شاہد نے مزید بتایا کہ اس سال لاڑکانہ ڈویژن میں خسرہ کے 400 کیسز رپورٹ ہوئے، جن میں 170 لاڑکانہ، 105 قمبر، 84 شکارپور، 66 جیکب آباد اور 43 کشمور کے ہیں، انہوں نے کہا کہ تین اموات بھی رپورٹ ہوئیں، دو قمبر اور ایک جیکب آباد میں، انہوں نے کہا کہ 13 روزہ مہم کے دوران پورے سندھ کی 1,190 یونین کونسلز میں 8.4 ملین بچوں کو اسکولوں اور فیلڈز میں موبائل ٹیموں، فکس پوائنٹس اور صحت کے مراکز کے ذریعے ویکسین دی جائے گی، مہم کی کامیابی کے لیے لائن ڈیپارٹمنٹس، ضلعی انتظامیہ، مذہبی رہنماؤں، عوامی نمائندوں اور میڈیا کا بھرپور تعاون حاصل کیا جائے گا، کمشنر لاڑکانہ طاہر حسین سانگی نے تمام متعلقہ محکموں کو ہدایت کی کہ وہ باہمی رابطے اور تعاون کے ساتھ مہم کے مؤثر نفاذ کو یقینی بنائیں، انہوں نے پولیس کو ٹیموں کی سیکیورٹی یقینی بنانے اور ضلعی تعلیم افسران و نجی اسکولوں کے ڈائریکٹرز کو مکمل تعاون کی ہدایت دی، اجلاس میں پی پی ایچ آئی، ای پی آئی کے فوکل پرسنز، ضلعی صحت افسران اور مختلف محکموں کے نمائندے شریک تھے۔
