کراچی(اسٹاف رپورٹر)واپڈا حکام کی جانب سے ایک اہم اعلامیہ جاری کیا گیا ہے جس کے مطابق واپڈا کے انتظامی حدود میں آنے والی حب کینال کو 48 گھنٹے کے لیے بند رکھنے کی درخواست کردی گئی ہے۔ اس حوالے سے پروجیکٹ ڈائریکٹر حب ڈیم واپڈا نے واٹر کارپوریشن حکام کو باضابطہ طور پر آگاہ کردیا ہے۔ ترجمان واٹر کارپوریشن کے مطابق واپڈا انتظامیہ نے ایک باضابطہ مراسلہ ارسال کیا ہے جس میں بتایا گیا ہے کہ حب کینال کو 28 اکتوبر سے 29 اکتوبر 2025 تک بند رکھا جائے گا۔ واپڈا کے مراسلے میں واضح کیا گیا ہے کہ حب کینال کی بندش کا مقصد حب ڈیم سے ایکس ریگولیٹر تک تفصیلی سروے اور ضروری مرمتی کاموں کی انجام دہی ہے تاکہ نظام کو مزید بہتر اور مستحکم بنایا جا سکے۔ ترجمان نے مزید بتایا کہ حب کینال کی بندش کے دوران کراچی کے ضلع غربی، ضلع کیماڑی اور ضلع وسطی میں پانی کی فراہمی عارضی طور پر معطل رہے گی۔ انہوں نے شہریوں سے اپیل کی کہ وہ پانی کے استعمال میں غیر ضروری ضیاع سے گریز کریں اور پانی کو انتہائی احتیاط کے ساتھ استعمال کریں تاکہ انہیں کسی قسم کی پریشانی کا سامنا نہ کرنا پڑے۔ ترجمان کے مطابق واٹر کارپوریشن انتظامیہ واپڈا سے مسلسل رابطے میں ہے اور جیسے ہی حب کینال سے پانی کی فراہمی معمول کے مطابق بحال ہوگی شہریوں کو فوری طور پر آگاہ کیا جائے گا۔
