سندھ کے عوام نے صبر سے وقت گزارا، اب قانون نافذ کرنے والے ادارے دل سے امن بحال کریں، محبوب عباسی

سندھ کے بااثر طبقات کو بھی امن کا حصہ بننا ہوگا، پی پی رہنما۔

ہم سب کافرض ہے کہ عوام کے زخموں کو محسوس کریں، سندھ کے لیے نیا باب لکھنے کا وقت ہے۔

جاگیرداروں اور عمائدین سے اپیل ، سندھ کو امن کا گہوارہ بنائیں۔رہنما پی پی پی کراچی

ہتھیار ڈالنے والوں سے امن کے محافظوں تک، سندھ بدل رہا ہے، محبوب عباسی

کراچی (25 اکتوبر2025) پاکستان پیپلز پارٹی کراچی کے رہنما محبوب عباسی نے کہا ہے کہ سندھ کی سرزمین صوفیاء، محبت اور رواداری کی دھرتی ہے، اور امن مشن 2025 اس روایت کی عملی تجدید ہے۔ انہوں نے کہا کہ شکارپور، کشمور اور گھوٹکی جیسے اضلاع میں برسوں سے جاری خوف اور بدامنی کے خاتمے کے بعد امید کے دیے دوبارہ جل اٹھے ہیں۔
محبوب عباسی نے اپنے بیان میں کہا کہ کچے کے علاقے کے 72 ڈاکوؤں کا ہتھیار ڈال دینا ایک تاریخی لمحہ ہے اور یہ عمل سندھ کے روشن مستقبل کی علامت ہے۔ انہوں نے کہا کہ یہ کامیابی حکومتِ سندھ، پولیس، رینجرز، قانون نافذ کرنے والے اداروں اور عوام کے مشترکہ عزم کا نتیجہ ہے۔
انہوں نے اداروں کو مخاطب کرتے ہوئے کہا کہ سندھ کے عوام نے دہائیوں تک خوف، محرومی اور غیر یقینی حالات کو صبر سے برداشت کیا۔ اب وقت آگیا ہے کہ ادارے اس درد کو محسوس کریں اور زیادہ دلجمعی، شفافیت اور انسان دوستی کے جذبے کے ساتھ امن کے قیام کو اپنا اولین فرض بنائیں۔ اگر نیت خالص ہو تو کوئی چٹان راستے کی رکاوٹ نہیں بن سکتی۔
پیپلز پارٹی کی قیادت کو خراجِ عقیدت پیش کرتے ہوئے محبوب عباسی نے کہا کہ شہید ذوالفقار علی بھٹو نے عوام کو شعور دیا، شہید محترمہ بے نظیر بھٹو نے جمہوریت اور ملک کے وقار کے لیے جان دی، اور چیئرمین بلاول بھٹو زرداری انہی خوابوں کو حقیقت میں بدلنے کے لیے مصروفِ جدوجہد ہیں۔ امن مشن 2025 انہی نظریات کی عملی شکل ہے، جہاں ریاست اور عوام ایک ساتھ کھڑے ہیں۔
محبوب عباسی نے سندھ کے بااثر سرداروں، عمائدین اور سیاسی رہنماؤں سے بھی اپیل کی کہ وہ امن و استحکام کے عمل میں اپنا کردار ادا کریں۔ انہیں یہ نہیں بھولنا چاہیے کہ یہ دھرتی ان کی اپنی ہے۔ امن، بھائی چارے اور انصاف کی فضا قائم کرنا ان کی بھی اتنی ہی ذمہ داری ہے جتنی کسی عام شہری کی۔
انہوں نے کہا کہ اگر سب طبقات ایمانداری اور خلوصِ نیت کے ساتھ آگے بڑھیں تو سندھ ایک بار پھر محبت، برداشت اور خوشحالی کی علامت بن سکتا ہے۔