اسلام آباد:وزیراعظم محمد شہباز شریف نے کہا ہے کہ پولیو ورکرز کی جرات، لگن اور جذبہ قابلِ فخر ہے، ان کی عظیم قربانیوں کے نتیجے میں انشاءاللہ پاکستان پولیو سے ہمیشہ کے لیے نجات حاصل کرے گا۔
اسلام آباد میں پولیو کے عالمی دن کی مناسبت سے تقریب سے خطاب کرتے ہوئے وزیراعظم نے وفاقی وزیر صحت، فوکل پرسن برائے انسدادِ پولیو، متعلقہ حکام اور بین الاقوامی شراکت داروں کی کاوشوں کو سراہا۔ وزیراعظم نے بتایا کہ سعودی ولی عہد شہزادہ محمد بن سلمان نے بل گیٹس فاؤنڈیشن کے ساتھ مل کر پولیو کے خاتمے کے لیے خطیر رقم مختص کی ہے۔
وزیراعظم شہباز شریف نے کہا کہ پولیو کے خلاف جنگ میں ہر ورکر کی محنت اور قربانی ناقابلِ فراموش ہے۔ انہوں نے پنجاب، خیبرپختونخوا، سندھ، بلوچستان، آزاد کشمیر اور گلگت بلتستان کے پولیو ورکرز کو شیلڈز بھی پیش کیں۔
