مکہ و مدینہ میں پاکستانی حجاج کا “بیان المرصوص” کی فتح پر اظہارِ مسرت — افواجِ پاکستان اور وزیراعظم کے لیے خصوصی دعائیں
جدہ: وفاقی وزیر برائے مذہبی امور سردار محمد یوسف نے کہا ہے کہ بھارت کے خلاف آپریشن “بیان المرصوص” میں کامیابی پر مکہ مکرمہ اور مدینہ منورہ میں موجود پاکستانی حجاج کرام نے بھرپور خوشی کا اظہار کیا ہے۔ حجاج کرام نے افواجِ پاکستان اور وزیراعظم کے لیے خصوصی دعائیں کیں اور شکرانے کے نفل بھی ادا کیے۔
جدہ میں ایک پریس کانفرنس سے خطاب کرتے ہوئے سردار محمد یوسف کا کہنا تھا کہ پاکستانی حجاج نے وطن کی فتح کو اللہ کی رحمت قرار دیا اور ملک کی سلامتی، استحکام اور ترقی کے لیے دعاگو دکھائی دیے۔
انہوں نے اپنے پانچ روزہ سعودی عرب کے دورے کے دوران پاکستانی حجاج کے لیے فراہم کی جانے والی سہولیات کا خود جائزہ لیا اور سعودی حکام سے اہم ملاقاتیں بھی کیں۔ سردار یوسف نے بتایا کہ ڈی جی حج اور ڈائریکٹر حج کو واضح ہدایات جاری کی گئی ہیں کہ حجاج کو بہترین سہولیات فراہم کی جائیں۔
وفاقی وزیر نے واضح کیا کہ حجاج کے امور میں کسی قسم کی غفلت یا کوتاہی ہرگز برداشت نہیں کی جائے گی۔ ان کا کہنا تھا کہ حکومت حجاج کی خدمت کو عبادت سمجھتی ہے اور اس میں کسی قسم کی کمی کو فوری طور پر دور کیا جائے گا۔
انہوں نے مزید کہا کہ پاکستانی حجاج کی جانب سے ملی جذبے اور قومی یکجہتی کا اظہار قابلِ ستائش ہے، جس سے دنیا بھر میں پاکستان کا مثبت تشخص اجاگر ہوتا ہے۔
اس پوسٹ کو شیئر کریں
