راولپنڈی
اقوام عالم میں پاکستان کا نام سربلند کرنے پر چیف آف آرمی سٹاف جنرل سید عاصم منیر اور ملک کی اعلی سیاسی قیادت مبارک باد کی مستحق ہے۔ مسلح افواج کے ہاتھوں ازلی دشمن کی ذلت آمیز شکست پر امت مسلمہ جشن منا رہی ہے۔ پاکستانی قوم کا جذبہ قابل تعریف ہے ۔
ان خیالات کا اظہار کمشنر راولپنڈی ڈویژن انجینئیر عامر خٹک نے ادارہ تعلیمات اسلامیہ پاکستان کے ڈپٹی ڈائریکٹر و ممبر امن کمیٹی شیخ محمد قاسم اور آل پاکستان پرائیویٹ سکولز مینجمنٹ ایسوسی ایشن شمالی پنجاب کے صدر ابرار احمد خان سے ملاقات کے موقع پر کیا۔ شیخ محمد قاسم نے راولپنڈی لیاقت باغ میں پاکستان زندہ آباد کانفرنس کے کامیاب انعقاد پر کمشنر راولپنڈی ڈویژن اور ڈپٹی کمشنر راولپنڈی کو مبارکباد پیش کی اور مفکر اسلام ، مفسر قرآن علامہ سید ریاض حسین شاہ کی لکھی گئی معرکتہ لارہ تفیسر تبصرہ کی روشنی میں سورہ العدیات پر لکھی گئی تفیسر کا ہدیہ پیش کیا۔ سید ریاض حسین شاہ نے مجاہدین اسلام کی خصوصیات سورہ العدیات کی روشنی یوں بیان کیں کہ چابک دست گھوڑوں کی قسم اور اماکن عبادت تک پہچانے والے اونٹوں کی قسم ، ہر اس سواری کی قسم جو مقصد سے قریب کردے ، شجاع و بہادر سواروں کی قسم ، گھوڑوں کے فراٹے بھرنے کی قسم ، گھوڑوں کے سموں سے سلگتی ہوئی آگ کی قسم ، صبح صبح بے دھڑک اور اچانک حملے کی قسم، گھروں سے پھیلتے بکھرتے ہوئے غبار کی قسم، اس وقت کی قسم جب گھوڑے دشمن کی صفوں کو درہم برہم کریں، اس مقام کی قسم جہاں گھوڑے تاراج کریں، فتح یاب ہونے کی قسم، ان نفوس قدسیہ کی قسم جو دلوں کو روشن کرکے دنیا کی محبت کو اجاڑ دیں
کمشنر راولپنڈی ڈویژن انجینئر عامر خٹک نے سورہ العدیات پر شاہ جی کی لکھی گئی تفیسر کی تعریف کی اور شکریہ ادا کیا۔ ابرار احمد خان نے کمشنر راولپنڈی ڈویژن سے نجی تعلیمی اداروں کے مسائل کے حوالے سے ملاقات کا وقت مانگا،عامر خٹک نے کہا کہ آپ ملاقات کے لیے میرے دفتر آسکتے ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
