صدر آصف علی زرداری اور وزیراعظم شہباز شریف کی اہم ملاقات، بھارتی جارحیت پر تبادلہ خیال
اسلام آباد: صدر مملکت آصف علی زرداری اور وزیراعظم محمد شہباز شریف نے آج ایوان صدر میں ایک اہم ملاقات کی۔ وزیراعظم نے صدر مملکت کو بھارت کی حالیہ جارحیت اور پاکستان کی جانب سے دیے جانے والے مؤثر جوابی آپریشن “بنیان مرصوص” کے بارے میں تفصیلی طور پر آگاہ کیا۔
ملاقات کے دوران نائب وزیراعظم اور وزیر خارجہ سینیٹر محمد اسحاق ڈار اور وزیر قانون و انصاف سینیٹر اعظم نذیر تارڑ بھی موجود تھے۔
صدر مملکت نے بھارتی بلا اشتعال جارحیت اور میزائل حملوں کا منہ توڑ جواب دینے پر پاکستان کی مسلح افواج کی غیر معمولی پیشہ ورانہ مہارت اور بہادری کی تعریف کی۔ انہوں نے کہا کہ پاکستان نے ایک ذمہ دار اور امن پسند ملک ہونے کے باوجود بھارتی اشتعال انگیزیوں پر کافی صبر کا مظاہرہ کیا۔
صدر زرداری نے افسوس کا اظہار کیا کہ بھارتی جارحیت کے بعد پاکستان کے پاس اپنی خودمختاری اور شہریوں کے تحفظ کے لیے سخت جواب دینے کے سوا کوئی اور راستہ نہیں بچا تھا۔ انہوں نے زور دے کر کہا کہ پوری پاکستانی قوم متحد ہے اور اپنی مسلح افواج کی مکمل حمایت کرتی ہے۔ صدر مملکت نے واضح کیا کہ پاکستان اپنی ملکی خودمختاری اور علاقائی سالمیت کا ہر قیمت پر دفاع کرے گا۔
اس پوسٹ کو شیئر کریں
