عابد لاشاری نے بھارت سے ایان کی ملک بدری کی شدید مذمت کی؛ معذور بچے کو علاج سے محروم کرنے کو انسانی حقوق کی سنگین خلاف ورزی قرار دیا
کراچی:نیشنل ڈس ایبلٹی اینڈ ڈوالپمنٹ فورم (این ڈی ایف) پاکستان کے صدر، عابد لاشاری نے بھارت سے ایان نامی پاکستانی معذور بچے کی ملک بدری کی شدید مذمت کی ہے، جو علاج معالجے کے لیے بھارت گیا تھا۔ آج جاری کیے گئے اپنے بیان میں، عابد لاشاری نے اس واقعے پر گہری تشویش کا اظہار کرتے ہوئے اسے معذور بچوں کے بنیادی انسانی حقوق کی سنگین خلاف ورزی قرار دیا۔انہوں نے کہا:
“ایک معصوم اور معذور بچے کو علاج سے محروم کرنا اور ملک بدر کرنا نہ صرف غیر انسانی عمل ہے بلکہ معذور افراد کے حقوق سے متعلق بین الاقوامی کنونشنز کی بھی کھلم کھلا خلاف ورزی ہے۔”
عابد لاشاری نے پاکستان اور بھارت کی حکومتوں سے مطالبہ کیا کہ وہ سیاسی تنازعات سے بالاتر ہو کر انسانی بنیادوں پر ایسے معاملات کو ترجیح دیں، خاص طور پر جہاں بچوں کی زندگیوں اور صحت کا سوال ہو۔ انہوں نے مزید عالمی انسانی حقوق کی تنظیموں اور معذوروں کے حقوق کے تحفظ کے لیے کام کرنے والے اداروں سے اپیل کی کہ وہ فوری طور پر نوٹس لیں اور مداخلت کریں تاکہ ایان جیسے بچوں کو سیاسی رکاوٹوں کا شکار نہ ہونا پڑے۔عابد لاشاری نے زور دیتے ہوئے کہا کہ یہ ایک تنبیہ ہے کہ معذور افراد کے لیے سرحد پار طبی تعاون کو مضبوط بنایا جائے تاکہ کوئی بھی بچہ مصنوعی رکاوٹوں کی وجہ سے تکلیف کا شکار نہ ہو۔”
نیشنل ڈس ایبلٹی اینڈ ڈوالپمنٹ فورم (این ڈی ایف) ایان اور اس کے خاندان کے ساتھ مکمل یکجہتی کا اظہار کرتا ہے اور انصاف کی فراہمی کا مطالبہ کرتا ہے۔
