جیکب آباد جمعیت علماء اسلام سندھ کے ترجمان ڈاکٹر اے جی انصاری نے کہا ہے کہ مظلوم کشمیریوں پر بھارتی فوج کی طرف سے مظالم کے پہاڑ ڈھائے جارہے ہیں، اگر یہ مظالم کسی مغربی ملک میں ہوتے تو انسانی حقوق کے علمبردار چیخ اٹھتے لیکن مظلوم کشمیریوں کے حق ان کی زبان میں چھالے پڑے ہوئے ہیں۔ مدرسہ تعلیم القرآن جیکب آباد میں منعقدہ اجتماع سے خطاب کرتے ہوئے جے یو آئی سندھ کے ترجمان نے مزید کہا کہ نو لاکھ بھارتی فوج نے مقبوضہ کشمیر کو جیل میں تبدیل کر کے کشمیری عوام سے شہری آزادی کا حق چھین رکھا ہے، کشمیر میں ہونے والے مظالم پر عالمی برادری کی خاموشی لمحہ فکریہ ہے، انہوں نے عالمی برادری سے مطالبہ کیا کہ کشمیریوں کو اقوام متحدہ کی 18 قراردادوں کے مطابق حق خودارادیت دی جائے۔ علاوہ ازیں جے یو آئی جیکب آباد کے پریس سیکریٹری اسداللہ حیدری نے ایک پریس ریلیز میں کہا ہے کہ جے یو آئی کی جانب سے کشمیریوں سے اظہار یکجہتی کے لیے 4 فروری (آج) جیکب آباد میں ریلی نکالی جائے گی، انہوں نے عوام کو ریلی میں بھرپور شرکت کی دعوت دیتے ہوئے کہا کہ عوام اپنے مظلوم کشمیری بھائیوں سے اظہار یکجہتی کے لیے باہر نکلیں اور کشمیریوں کی جدوجہد کی حمایت میں آواز بلند کریں۔
جیکب آباد میں لوکل گاڑیوں سے ٹول ٹیکس نہ لینے کے اعلان کے باوجود ٹیکس کی وصولی جاری، مقامی لوگوں کا ٹول پلازہ کے عملے کے خلاف احتجاج۔ تفصیلات کے مطابق جیکب آباد ایم این اے و چیئرمین قائمہ کمیٹی کمیونیکیشن میر اعجاز حسین جکھرانی نے جیکب آباد قائم کئے گئے ٹول پلازہ پر مقامی لوگوں سے ٹول ٹیکس نہ لینے کا اعلان کیا تھا لیکن ٹول پلازہ کے ملازمین کی جانب سے مقامی لوگوں سے ٹیکس وصول کیا جارہا ہے جس کی وجہ سے مقامی لوگوں کو شدید مشکلات کا سامنا کرنا پڑ رہا ہے، ٹول پلازہ پر مقامی لوگوں سے ٹول ٹیکس لینے کے خلاف علاقہ مکینوں نے اپنی گاڑیاں کھڑی کرکے احتجاج کیا اور کہا کہ ایم این اے کے اعلان کو ابھی ایک ہفتہ بھی نہیں گزرا اور یہ ٹیکس وصول کرنا شروع ہوگئے ہیں، انہوں نے کہا کہ ٹول پلازہ غیر قانونی ہے اس کے باوجود مقامی لوگوں سے ٹول ٹیکس لیا جارہا ہے، شہریوں کے احتجاج کے بعد مقامی لوگوں سے ٹیکس نہ لینے کا وعدہ کیا گیا تھا لیکن اس پر عملدرآمد نہیں ہورہا، انہوں نے مطالبہ کیا کہ فلفور غیر قانونی ٹول پلازہ کو ختم کیا جائے بصورت دیگر احتجاج کیا جائے گیا
جیکب آباد پولیو مہم کے دوران 1324 پولیس افسران و اہلکار سیکورٹی کے فرائض انجام دیں گے۔ تفصیلات کے مطابق جیکب آباد میں 3 فروری سے 10 فروری تک جاری رہنے والی قومی پولیو مہم کے دوران پولیو ٹیموں کو مکمل سیکورٹی فراہم کرنے کے لیے پولیس کی جانب سے سیکورٹی پلان تشکیل دیا گیا ہے، پولیس ترجمان کے مطابق قومی مہم کے دوران ضلع بھر میں مجموعی طور پر 1324 پولیس افسران و اہلکار سیکورٹی کے فرائض انجام دیں گے، پولیو ٹیموں کی حفاظت کے لیے 48 پولیس موبائل گاڑیاں اور 10 موٹر سائیکل ایگلز گشت کریں گی جبکہ 8 ریزور پلٹونز پر مشتمل موبائل گاڑیاں کسی بھی ہنگامی صورتحال سے نمٹنے کے لیے ہمہ وقت تیار رہیں گی، ایس ایس پی جیکب آباد کیپٹن (ر) صدام حسین خاصخیلی کی ہدایات پر بنائے گئے سیکورٹی پلان کے تحت 1324 پولیس اہلکار اور افسران کو ضلع بھر کے مختلف مقامات پر تعینات کیا گیا ہے، جن میں 10 خواتین اہلکار بھی شامل ہیں یہ اہلکار مہم کے دوران تمام ٹیموں کی حفاظت کو یقینی بنائیں گے۔ سیکورٹی پلان کے مطابق پولیو مہم میں شامل ہر موبائل ٹیم، ٹرانزٹ پوائنٹ اور فکسڈ ٹیم کے ساتھ پولیس اہلکاروں کو تعینات کیا گیا ہے تاکہ ٹیمیں اپنے کام کو مکمل محفوظ ماحول میں انجام دے سکیں پولیو مہم کی موثر نگرانی اور بروقت اطلاعات کے تبادلے کے لیے ایک خصوصی کنٹرول روم قائم کیا گیا ہے جہاں سے مہم کے دوران ہر لمحے کی صورتحال پر نظر رکھی جائے گی پولیو مہم کے دوران فوری اور موثر رابطے کو یقینی بنانے کے لیے ایک سینئر افسر کو فوکل پرسن مقرر کیا گیا ہے تاکہ کسی بھی قسم کی صورتحال میں بروقت مدد فراہم کی جا سکے۔ پولیو مہم کے پہلے دن سیکورٹی پلان کے تحت حفاظتی انتظامات سخت کئے گئے تھے، ایس ایس پی جیکب آباد صدام حسین خاصخیلی نے قائم پولیو ٹرانزٹ اور فکسڈ پوائنٹس کا دورہ کرکے سیکورٹی انتظامات کا جائزہ لیا، ایس ایس پی جیکب آباد کے مطابق ضلع بھر کے تمام شہروں و دیہاتوں سمیت ٹرانزٹ پوائٹس پر پولیو ٹیمیں پولیس کی نگرانی میں خدمات انجام دے رہی ہیں، ایس ایس پی نے پولیس اہلکاروں کو ہدایت جاری کی کہ وہ پولیو ٹیموں کی حفاظت کو یقینی بنائیں اور پولیو مہم کو کامیاب بنانے کے لیے ہر ممکن اقدامات کئے جائیں۔
جیکب آباد میں نامعلوم چوروں نے ٹرانسفارمر سے لاکھوں روپے مالیت کے کاپر کے کوائل چوری کرلیے۔ تفصیلات کے مطابق جیکب آباد کے قریب مبارکپور تھانہ کی حدود گاؤں قبول کھوسو میں نامعلوم چور رات کی تاریکی میں ٹرانسفارمر سے لاکھوں روپے مالیت کے کاپر کے کوائل چوری کرکے لیے گئے، ٹرانسفارمر سے کوائل چوری ہونے کی وجہ سے پورا علاقہ بجلی سے محروم ہوگیا ہے، علاقہ مکینوں نے مطالبہ کیا ہے کہ فلفور چوروں کو گرفتار کرکے بجلی کو بحال کیا جائے۔
جیکب آبادسندھ کے پہلے وزیر اعلیٰ شہید اللہ بخش سومرو کی صاحبزادی اور سابق نگران وزیر اعظم محمد میاں سومرو کی والدہ انتقال کرگئیں۔ تفصیلات کے مطابق سندھ کے پہلے وزیر اعلیٰ شہید اللہ بخش سومرو کی صاحبزادی اور سابق نگران وزیر اعظم محمد میاں سومرو کی سوتیلی ماں رضیہ سومرو طویل علالت کے بعد انتقال کرگئیں، اہلخانہ کے مطابق مرحومہ کی نماز جنازہ (آج) 4 فروری کو 3 بجے جیکب آباد کے عید گاہ میں ادا کی جائے گی جبکہ تدفین آبائی گاؤں احمد میاں سومرو میں کی جائے گی۔ جے یو آئی کے صوبائی ترجمان ڈاکٹر اے جی انصاری، صحافیوں حاکم علی ایری، عبدالرحمن آفریدی، زاہد حسین رند، آصف علی بھٹی، عبدالغنی کھوسو، ایم ڈی عمرانی اور دیگر نے محمد میاں سومرو سے والدہ کی وفات پر افسوس کا اظہار کیا۔
جیکب آباد میں پولیس کی کاروائی، کروڑوں روپے مالیت کی آئس اور چرس برآمد، دو ملزمان گرفتار۔ تفصیلات کے مطابق جیکب آباد کے صدر تھانہ کی پولیس نے شمبے شاہ پولیس چیک پوسٹ پر چیکنگ کے دوران بلوچستان سے آنے والی مزدا گاڑی پر لوڈ رکشہ کی تلاشی کے دوران خفیہ خانوں میں چھپائی گئی 7 کلو آئس، 6 کلو چرس اور 14 کلو گُردہ برآمد کرکے کوئٹہ سے تعلق رکھنے والے دو بین الصوبائی منشیات کے اسمگلروں شائستہ اور عبدالرزاق بڑیچ کو گرفتار کرلیا ہے، پولیس کے مطابق منشیات کی یہ بڑی کھیپ کوئٹہ سے سکھر اسمگل کی جارہی تھی جس کو پولیس نے ناکام بنا دیا، برآمد کی گئی منشیات کی قیمت کروڑوں روپے ہے جبکہ گرفتار ملزمان کے خلاف منشیات ایکٹ کے مقدمہ درج کرلیا گیا ہے۔
