وزیر اعلیٰ پنجاب مریم نواز شریف کے ویژن “صحت سب کیلئے” پر عملدرآمد یقینی بناتے ہوئے 2024کے دوران لاہور جنرل ہسپتال میں تقریبا 20لاکھ مریضوں کا بغیر پرچی فیس علاج معالجہ ہوا جبکہ اسی عرصے کے دوران ہسپتال میں مختلف نوعیت کے98ہزار925مریضوں کے چھوٹے بڑے آپریشنز بھی کیے گئے، اس امر کا اظہار پرنسپل پوسٹ گریجویٹ میڈیکل انسٹی ٹیوٹ و امیر الدین میڈیکل کالج پروفیسر ڈاکٹر محمد الفرید ظفر نے گزشتہ سال کی کارکردگی کا جائزہ اجلاس کی صدارت کرتے ہوئے کیا جس میں پروفیسر زصاحبان، ایم ایس ڈاکٹر فریاد حسین، ڈائریکٹر ایمرجنسی پروفیسر خضر حیات گوندل، ڈائریکٹر ویجیلنس ڈاکٹر عدنان مسعود، ڈاکٹر جعفر حسین شاہ، ڈاکٹر لیلیٰ شفیق، ڈاکٹر عمارہ اختر، ڈاکٹر نادیہ ارشد، ڈاکٹر عبدالعزیز،ڈاکٹر سلمان شکیل سمیت دیگر ڈاکٹرز موجود تھے۔
پروفیسر الفرید ظفر نے کہا کہ صوبائی وزیرصحت خواجہ سلمان رفیق کی رہنمائی میں ہسپتال میں سینئر کنسلٹنٹ کی دستیابی،معیاری طبی سہولیات کی فراہمی، مانیٹرنگ و فیڈبیک کا نظام اور مخیر حضرات کے تعاون سے مریضوں و لواحقین کو مفت کھانے کی سہولت اور تیمارداروں کے لئے مہمان خانوں کی تعمیر سے شہریوں نے سکھ کا سانس لیا اور ایل جی ایچ انتظامیہ پر اعتماد بڑھا۔ انہوں نے مزید کہا کہ دکھی انسانیت کی بہتر سے بہتر خدمت جنرل ہسپتال کے ہیلتھ پروفیشلنز کا طرہ امتیاز ہے، ماضی کی روایات کو برقرار رکھتے ہوئے امسا ل 2025میں بھی مریض دوست پالیسیوں کا سلسلہ جاری رکھیں گے تاکہ پنجاب اور دوسرے صوبوں سے علاج معالجے کے لئے آنے والے لوگوں کو بر وقت معیاری طبی سہولیات میسر آ سکیں۔پروفیسر الفرید ظفر نے مزید کہا کہ انسانی جان سے بڑھ کر کوئی چیز مقدم نہیں ہو سکتی لہذا ہیلتھ پروفیشنلز کو چاہیے کہ وہ بہترین اور معیاری طبی سہولیات کی فراہمی کے لئے ہمہ وقت چاق وچوبند رہیں۔ پرنسپل پروفیسر الفرید ظفر نے کہا کہ گزشتہ برسوں کے مقابلے میں اس سال لاہور جنرل ہسپتال کی کارکردگی میں مزید مثبت اضافہ ہوا ہے جو بلا شبہ ایک ٹیم ورک ہے۔انہوں نے کہا کہ سینئر ڈاکٹرز اور نرسز اور پیرا میڈیکل سٹاف اس ہسپتال میں ایک فیملی کی طرح شہریوں کو طبی امداد کی فراہمی کے لئے سرگرم عمل ہیں اور اس امر کے لئے پر عزم ہیں کہ لاہور جنرل ہسپتال جیسے تاریخی ادارے کو مثالی اور سٹیٹ آف دی آرٹ بنانے کا سفر جاری رکھیں گے جس کے لئے حکومتی سرپرستی کے ساتھ ساتھ ہماری انفرادی اور اجتماعی کاوشوں کو کلیدی عمل دخل حاصل ہوتا ہے۔
میڈیکل سپرنٹنڈنٹ ڈاکٹر فریاد حسین نے ہسپتال کی کارکردگی پر روشنی ڈالتے ہوئے بتایا کہ 12ماہ کے دوران 119757الٹرا ساؤنڈ، 289574ایکسرے، 73586سی ٹی سکین،15898ایم آر آئی اور18364ڈائلسز کیے گئے۔ اسی دوران 68164ای سی جی، 6651گیسڑو سکوپی،522نیورو انجیوگرافی اور12767بچوں کی پیدائش ہوئی۔ انہوں نے اس امر پر اطمینان کا اظہار کیا کہ پرنسپل پروفیسر الفرید ظفر کی سربراہی میں لاہور جنرل ہسپتال ہر سال پہلے سے زیادہ شہریوں کو طبی سہولتیں فراہم کرتا ہے۔
