گورنمنٹ مسلم ہائیر سیکنڈری سکول سید پور روڈ میں نماز استسقاء ادا کی گئی،جس کی امامت سی ای او ایجوکیشن اتھارٹی راولپنڈی امان اللہ خان نے کی۔ آل پاکستان پرائیویٹ سکولز مینجمنٹ ایسوسی ایشن اور پبلک سیکٹر سے وابستہ سینکڑوں طلبہ و اساتذہ نے شرکت کی.

راولپنڈی

گورنمنٹ مسلم ہائیر سیکنڈری سکول سید پور روڈ میں نماز استسقاء ادا کی گئی،جس کی امامت سی ای او ایجوکیشن اتھارٹی راولپنڈی امان اللہ خان نے کی۔ آل پاکستان پرائیویٹ سکولز مینجمنٹ ایسوسی ایشن اور پبلک سیکٹر سے وابستہ سینکڑوں طلبہ و اساتذہ نے شرکت کی.نماز کی ادائیگی کے بعد سی ای او ایجوکیشن اتھارٹی راولپنڈی امان اللہ خان نے اپنے خیالات کا اظہار کرتے ہوئے کہا کہ ہم سب کو انفرادی اور اجتماعی طور پر اللہ کے حضور استغفار کرنا چاہئے۔پبلک و نجی شعبے کے اساتذہ اپنے طلباء کے ہمراہ سکول اسمبلی میں دعاؤں کا اہتمام کریں۔ہمیں اپنے گناہوں کی معافی طلب کرنی چاہیے۔آل پاکستان پرائیویٹ سکولز مینجمنٹ ایسوسی ایشن شمالی پنجاب کے صدر ابرار احمد خان نے کہا کہ ملک میں بارشوں کے نہ ہونے کے باعث خشک سالی کے خدشات بڑھ گئے ہیں۔ خطے میں موسمیاتی تبدیلیوں کے باعث اقتصادی و معاشرتی مسائل جنم لے رہے ہیں۔ان کا مزید کہنا تھا کہ تدارک کے لیے رب العزت کی بارگاہ میں سچے دل سے توبہ کرنی چاہیے کہ وہ باران رحمت نازل فرمائے اور خشک زمین کو اپنی رحمت سے سیراب کرے۔ نماز استسقاء میں ڈی ای او سیکنڈری سکول ڈاکٹر گل احمد، ڈی ای او ایلیمنٹری ڈاکٹر اظہر محمود ملک، راجہ طاہر، کامران سیف قریشی ،اوزون سکولز سسٹم کے پرنسپل شیراز مغل، محمد عثمان اور نالج پوائنٹ کے پرنسپل افتخار احمد سینکڑوں طلبہ کے ہمراہ شریک ہوئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔