کراچی
مور خہ 28جنوری 2025
کراچی 28 جنوری ۔حکومت سندھ نے فروری 2025 میں گرین لائن اور اورنج لائن بس سروس کا انتظام سنبھالنے کی تیاریاں مکمل کرلی ہیں۔ سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن کی زیر صدارت ایک اعلیٰ سطح کا اجلاس کراچی میں ہوا، جس میں وفاقی حکومت سے گرین لائن بس سروس کا انتظام سندھ حکومت کو منتقل کرنے کے لیے رسمی کارروائیاں مکمل کرنے پر غور کیا گیا۔ اجلاس میں اورنج لائن بس سروس کے آپریشنز بھی حکومت سندھ کے حوالے کرنے پر تبادلہ خیال کیا گیا۔ اجلاس میں سیکریٹری ٹرانسپورٹ اسد ضامن، ایم ڈی سندھ ماس ٹرانزٹ اتھارٹی کمال دایو، سی ای او ٹرانس کراچی طارق منظور چانڈیو اور گرین لائن بس سروس کے کنسلٹنٹس اور اورنج لائن بس سروس کے آپرئیٹرز نے شرکت کی۔ اجلاس میں سینئر وزیر شرجیل انعام میمن نے آپریشنز کی منتقلی کو بغیر کسی رکاوٹ کے یقینی بنانے پر زور دیا اور کنسلٹنٹس کو ضروری کارروائیوں میں تیزی لانے کی ہدایت کی۔ سینئر وزیر شرجیل انعام میمن نے سیکریٹری ٹرانسپورٹ اسد ضامن کو منصوبے کے معاہدے میں اصلاحات کے لیے قانونی پہلوؤں پر غور کرنے کی ہدایت کی۔ اجلاس کےموقع پر بات کرتے ہوئے سینئر وزیر شرجیل انعام میمن نے کہا کہ وفاقی حکومت کی جانب سے گرین لائن منصوبہ جنوری میں حکومت سندھ کو سونپا جانا تھا، سندھ حکومت فروری 2025 میں گرین لائن بس سروس کے آپریشنز سنبھالنے کے لیے مکمل طور پر تیار ہے۔ انہوں نے کہا کہ شکایتیں تھیں کہ وفاقی حکومت نے گرین لائن میں مہنگے کانٹریکٹس کئے ہیں، حوالگی کے بعد حکومت سندھ اس پر دوبارہ غور کرے گی، گرین لائن منصوبہ کراچی کے مسافروں کے لیے ایک اہم سہولت ہے، اور ہم اس کی کارکردگی اور معیار کو بہتر بنانے کے لیے پرعزم ہیں۔ سینئر وزیر شرجیل انعما میمن نے کہا کہ ہماری ترجیح عوام کو ایک قابل اعتماد اور آرام دہ پبلک ٹرانسپورٹ نظام فراہم کرنا ہے، سندھ حکومت شہری مراکز کی بڑھتی ہوئی ضروریات کو پورا کرنے کے لیے پبلک ٹرانسپورٹ کے منصوبوں کو جدید بنانے اور توسیع دینا چاہتی ہے۔ انہوں نے کہا کہ منتقلی کے بعد، سندھ حکومت گرین لائن بس سروس کو مستحکم شہری ٹرانزٹ کے ایک ماڈل کے طور پر برقرار رکھنے کے لیے آپریشنل بہتری اور اپ گریڈز پر عمل درآمد کرے گی۔
