کراچی (23 جنوری 2025) وزیراعلیٰ سندھ کے معاونِ خصوصی برائے چیف منسٹر انسپیکشن، انکوائریز اینڈ امپلیمینٹیشن ٹیم ڈپارٹمنٹ و پی پی پی سندھ کے جنرل سیکریٹری سینیٹر وقار مہدی نے کہا ہے کہ حکومتِ سندھ کی جانب سے ضلع کورنگی میں اربوں روپوں کی لاگت سے 9 میگا پروجیکٹس زیرِ تعمیر ہیں، جن کے پایئہ تکمیل پر پہنچنے سے عوام کی سہولیات میں اضافہ اور زندگی میں آسانی پیدا ہوگی۔ انہوں نے کہا کہ کراچی بھر میں کے ڈی اے کی زیر نگرانی 136 جاری ترقیاتی منصوبوں میں سے کوئی ایک بھی دیگر صوبوں کی طرح نمائشی اسکیم نہیں ہے، ہر منصوبہ شہر کی ضرورت اور عوام کی سہولت کے لیے ہے۔ان خیالات کا اظہار انہوں نے ضلع کورنگی میں جاری ترقیاتی منصوبوں کا معائنہ کرنے کے موقع پر میڈیا سے گفتگو کرتے ہوئے کیا۔ وقار مہدی کا کہنا تھا کہ ترقیاتی اسکمیوں کے معیار اور تکمیل کی مقررہ مدت پر بلکل بھی کمپرومائیز نہیں کیا جائے گا، اور اس حوالے سے سامنے آنے والی ہر رکاوٹ کو ہٹا دیا جائے گا۔ انہوں نے کہا کہ چیئرمین بلاول بھٹو زرداری کے ویژن کے مطابق کراچی بھر میں بلا امتیاز اربوں کے ترقیاتی کام جاری ہیں، جس کی ماضی میں کوئی نظیر نہیں ملتی۔ انہوں نے کہا کہ عوام کو سہولیات پہنچا کر خدمت کرنا پیپلز پارٹی کی صوبائی حکومت کی ذمہ داری ہے، اور سندھ حکومت وزیراعلیٰ مراد علی شاہ کی قیادت میں چیئرمین بلاول بھٹو زرداری کے ویژن پر عملدرآمد کے لیے پرعزم ہے اور وہ تمام اضلاع میں جاری ترقیاتی کاموں کا خود معائنہ کریں گے کاموں کے معیار اور رفتار کا جائزہ لیں گے۔ دریں اثناء، وقار مہدی نے ڈپٹی کمشنر کورنگی کے دفتر میں ایک اہم اجلاس کی صدارت کی، جس میں ڈی سی کورنگی مسعود بھٹو، ممبر سی ایم آئی ٹی ٹیم ڈپارٹمنٹ عبدالسلام میمن، ادارہِ ترقیات کراچی کے چیف انجنیئر، انجنیئر، کنسلٹنٹس، اور دیگر معلقہ افسران بھی موجود تھے۔ وزیراعلیٰ کے معاونِ خصوصی وقار مہدی کو ادارہِ ترقیات کراچی کی جانب سے ضلع کورنگی میں جاری صوبائی ترقیاتی کاموں اور میگا پروجیکٹس پر بریفنگ دی گئی۔ وقار مہدی نے کے ڈی اے افسران اور کنسلٹنٹس سے باز پرس کی اور نامکمل بریفنگ پر اپنی برہمی کا اظہار کیا۔ انہوں نے کے ڈی اے کے کنسلٹنٹس کی ازسرِ نو پری کوالیفکیشن کرانے، سوائیل چیک کرانے، اور منصوبوں کی پیشرفت رپورٹ ماہانہ کی بنیاد پر محکمہ چیف منسٹر انسپیکشن، انکوائریز اینڈ امپلیمینٹیشن ٹیم کے پاس جمع کرانے کی ہدایات دیں۔ وقار مہدی نے ڈپٹی کمشنر کورنگی کو بھی ہدایا ت دیں کہ وہ جاری منصوبوں کی نگرانی کریں تاکہ عوام کے لیے بننے والے منصوبوں میں معیار کو یقینی بنایا جائے۔ بعدازاں، وزیراعلیٰ سندھ کے معاونِ خصوصی برائے محکمہ سی ایم آئی ٹی سینیٹر وقار مہدی نے ضلع کورنگی میں حکومتِ سندھ کی فنڈنگ سے زیرِ تعمیر ترقیاتی اسکیموں کا معائنہ کیا۔ انہوں نے 13 ہزار روڈ، 20 ہزار روڈ ، کورنگی نمبر 5 تعمیر کیا جانے والا فلائی اوور، اللہ والی کالونی میں روڈ و برساتی نالہ اور دیگر تعمیراتی کاموں کا معائنہ کیااور متعلقہ افسران کو ضروری ہدایات دیں۔ اس موقع پر پی پی پی ضلع کورنگی کے صدر جانی میمن، جنرل سیکریٹری شرجیل رضوانی، سینئر نائب صدر شیراز وحید ،سیکریٹری اطلاعات احمد رضا اور دیگر بھی موجود تھے۔
