ڈاکٹر رحمت عزیز خان چترالی*
ذوالفقار احمد چیمہ کی انگریزی زبان میں لکھی ہوئی 272 صفحات پر کتاب “Straight Talk” چالیس مضامین کا مجموعہ ہے جس میں مصنف نے پاکستان کو درپیش سماجی، سیاسی اور ادارہ جاتی مسائل پر تفصیل سے روشنی ڈالی ہے۔ مصنف نے اس کتاب کا انتساب خاص طور پر پاکستان کے نوجوانوں کے لیے وقف کیا ہے۔ کتاب میں قانون کی حکمرانی، بدعنوانی، احتساب، جمہوریت، تعلیم، پولیسنگ کے نظام اور اسکل ڈیولپمنٹ جیسے موضوعات پر تفصیلی گفتگو کی گئی ہے۔ مصنف نے نہ صرف مسائل کی نشاندہی کی ہے بلکہ ان کے ممکنہ حل کے لیے تجاویز بھی پیش کیے ہیں۔
کتاب کا مرکزی موضوع پاکستان کے مسائل اور ان کے حل کے لیے عملی تجاویز ہیں۔ مصنف نے اپنی زندگی کے تجربات کو بنیاد بنا کر ادارہ جاتی اصلاحات، میرٹ اور اصول پسندی پر زور دیا ہے۔ کتاب میں نوجوانوں کو بہتر معاشرتی کردار ادا کرنے کی ترغیب دی گئی ہے اور مختلف موضوعات جیسے کہ قانون کی حکمرانی، بدعنوانی کے خاتمے اور جدید پولیسنگ نظام کے قیام پر مفصل روشنی ڈالی گئی ہے۔
یہ کتاب 43 مضامین پر مشتمل ہے جن میں ہر مضمون میں ایک منفرد موضوع پر ہے۔ مضامین کی ترتیب منطقی اور مربوط ہے جس سے قارئین کو کتاب کے پیغام کو سمجھنے میں آسانی ہوتی ہے۔ کتاب کا دیباچہ مصنف نے خود لکھا ہے جس میں انہوں نے کتاب لکھنے کے محرکات کو بیان کیا ہے۔ کتاب میں ذاتی تجربات، سفرنامے اور ہلکے پھلکے مزاح کے ذریعے قارئین کی دلچسپی برقرار رکھی گئی ہے۔
ذوالفقار احمد چیمہ کی یہ کتاب نہ صرف ایک معلوماتی مجموعہ ہے بلکہ یہ قارئین کو ایک بہتر شہری بننے کی ترغیب بھی دیتی ہے۔ کتاب میں مصنف کے عملی تجربات، اصول پسندی اور میرٹ پر مبنی فیصلوں کی عکاسی کی گئی ہے۔ مصنف نے اپنے کیریئر کے دوران پیش آنے والے چیلنجز اور ان کے حل کو تفصیل سے بیان کیا ہے۔ خاص طور پر، قانون کی حکمرانی اور ادارہ جاتی اصلاحات پر ان کی تجاویز قابل غور ہیں۔
مصنف نے پاکستان کے نوجوانوں کو یہ پیغام دیا ہے کہ وہ اپنی صلاحیتوں کو بروئے کار لا کر ملک کی ترقی میں کردار ادا کریں۔ کتاب کا انداز غیر رسمی اور دوستانہ ہے، جو اسے نوجوان قارئین کے لیے زیادہ پرکشش بناتا ہے۔
“اسٹریٹ ٹاک” ایک ایسی کتاب ہے جو نہ صرف معلومات سے بھرپور ہے بلکہ قارئین کو عملی اقدامات کرنے کی تحریک بھی دیتی ہے۔ یہ کتاب ان افراد کے لیے خاص طور پر مفید ہے جو پاکستان کے مسائل کو سمجھنا اور ان کے حل کے لیے عملی تجاویز پر غور کرنا چاہتے ہیں۔ ذوالفقار احمد چیمہ کی صاف گوئی اور اصول پسندی کی وجہ سے اس کتاب کو ایک منفرد مقام حاصل ہوگا۔ میں کتاب کے پبلشر علامہ عبدالستار عاصم اور مصنف کو اتنی اچھی اور معلوماتی کتاب تخلیق کرنے پر مبارکباد پیش کرتا ہوں۔
*ڈاکٹر رحمت عزیز خان چترالی کا تعلق خیبرپختونخوا چترال سے ہے آپ اردو، انگریزی اور کھوار زبان میں لکھتے ہیں ان سے اس ای میل rachitrali@gmail.com اور واٹس ایپ نمبر 03365114595 پر رابطہ کیا جاسکتا ہے۔
