پریس کانفرنس
کراچی ( ) پاکستان مرکزی مسلم لیگ کے رہنماؤں نے مرکزی مسلم لیگ ہاؤس کراچی میں ایک اہم پریس کانفرنس سے خطاب کرتے ہوئے سندھ میں بڑھتی ہوئی محرومیوں اور حکومتی غفلت کے خلاف 25 جنوری کو حقوق سندھ مارچ نکالنے کا اعلان کیا۔ اس موقع پر مرکزی مسلم لیگ سندھ کے صدر فیصل ندیم، جنرل سیکرٹری اکرم عادل،نائب صدرسجاداعوان، کراچی کے صدر احمد ندیم اعوان ،سندھ کے میڈیاسیکرٹری طہ منیب و دیگر رہنما موجود تھے۔فیصل ندیم نے پریس کانفرنس سے خطاب کرتے ہوئے کہا کہ سندھ پاکستان کا سب سے زیادہ باوسائل صوبہ ہے۔ یہ نہ صرف تیل، گیس اور کوئلے کی صورت میں ملکی معیشت کا ستون ہے، بلکہ سندھ کی زرخیز زمینیں بھی پاکستان کی خوشحالی میں اہم کردار ادا کرتی ہیں۔ تاہم، افسوس کا مقام یہ ہے کہ صوبے کا دارالحکومت کراچی، جو پاکستان کی معاشی شہہ رگ ہے، اپنی حالت زار کی وجہ سے پریشانی کا شکار ہے۔ شہرقائدکے باسیوں کو نہ تو مناسب سڑکیں میسر ہیں اور نہ ہی سیوریج کا نظام ۔ پورے سندھ میں عوام کو صاف پانی کی فراہمی ایک چیلنج ہے۔ سندھ کی تعلیم کی صورتحال انتہائی تشویشناک ہے، جہاں ہزاروں اسکولوں میں سہولتوں کا فقدان ۔ یہی نہیں بلکہ شعبہ صحت میں بھی نمائشی ہسپتالوں کے سوا عوام کو کچھ نہیں مل رہا۔فیصل ندیم کاکہناتھاکہ یہ صورتحال سندھ کے عوام کے لیے انتہائی مایوس کن ہے، اور یہ سب حکومتی غفلت اور کرپشن کے نتیجے میں ہو رہا ہے۔ سندھ کے عوام گزشتہ کئی دہائیوں سے وڈیروں اور نااہل حکمرانوں کے رحم و کرم پر ہیں، جنہوں نے انہیں بنیادی حقوق سے محروم کر دیا ہے۔ ہم اس صورت حال کے خلاف اٹھ کھڑے ہوئے ہیں اور 25 جنوری کو حقوق سندھ مارچ کے ذریعے حکومت کو یہ پیغام دیں گے کہ اب مزید ظلم و استحصال برداشت نہیں کیا جائے گا۔ ہمیں اس صورت حال کا مقابلہ کرنا ہوگا اور سندھ کے عوام کے حقوق کا تحفظ کرنا ہوگا۔مرکزی مسلم لیگ سندھ کے عوام کو کچے اور پکے کے ڈاکوؤں سے نجات دلاکررہے گی ۔سندھ جنرل سیکرٹری اکرم عادل نے کہا کہ حقوق سندھ مارچ 25 جنوری کو مزار قائد سے شروع ہوگا، جس کا مقصد سندھ کے عوام میں آگاہی پیدا کرنا ہے کہ ان کے حقوق کا استحصال کیا جا رہا ہے ۔ مارچ کا سفر سندھ کے مختلف شہروں تک جاری رہے گا، اور اس دوران عوامی اجتماعات منعقد کیے جائیں گے۔انہوں نے مزید کہا کہ پیپلز پارٹی نے ایوان صدر کی کرسی پر پانچ مرتبہ، ایوان وزیراعظم کی کرسی پر پانچ مرتبہ، اور ایوان وزیر اعلیٰ کی کرسی پر گیارہ مرتبہ حکومت کی۔ اس کے باوجود آج بھی وہ وفاق سے سپورٹ نہ ملنے کا رونا رو رہی ہے۔ یہ سمجھنا ضروری ہے کہ پیپلز پارٹی خود کئی بار اعلیٰ ایوانوں میں اقتدار کے مزے لے چکی ہے، لیکن اب وہ مسلسل وفاق کی حمایت نہ ملنے کی شکایت کر رہی ہے۔کراچی کے صدر احمد ندیم اعوان نے کہا کہ سندھ بشمول کراچی کے عوام کئی دہائیوں سے محرومیوں کا شکار ہیں۔ حکومتی غفلت کی وجہ سے یہ صوبہ پسماندگی کی دلدل میں دھنستا جا رہا ہے۔ وقت آ چکا ہے کہ عوام اپنے حقوق کے لیے آواز اٹھائیں اور اس مارچ کا حصہ بنیں۔ یہ مارچ سندھ کے عوام کے لیے ایک نیا موقع فراہم کرے گا کہ وہ اپنی تقدیر بدلیں اور اپنے حقوق کا حساب طلب کریں۔فیصل ندیم نے مارچ کے روٹ کے حوالے سے کہا کہ حقوق سندھ مارچ 25 جنوری کو مزار قائد سے شروع ہو کر سکھر پہنچے گا۔ اس دوران مارچ مختلف شہروں سے گزرتے ہوئے عوام کے حقوق کے تحفظ کے لیے جدوجہد کرے گا، اور مقامی قیادت کے ساتھ عوام سے خطاب کیا جائے گا۔پریس کانفرنس کے اختتام پر رہنماؤں نے سندھ کے عوام سے اپیل کی کہ وہ اس مارچ میں بھرپور شرکت کریں اور اپنے حقوق کے لیے آواز اٹھائیں۔
جاری کردہ: شعبہ نشر و اشاعت، پاکستان مرکزی مسلم لیگ کراچی
ڈپٹی انفارمیشن سیکرٹری سندھ: طہٰ منیب 03213636746ڈپٹی انفارمیشن سیکرٹری کراچی: محمد افضل 03052572723
