نمبر: بی آئی ای/پی آر/009/ 2025 تاریخ: 05 جنوری 2025ء
پریس ریلیز
چیئرمین اعلیٰ ثانوی تعلیمی بورڈ کراچی سید شرف علی شاہ نے انٹرمیڈیٹ حصہ اول کے سالانہ امتحانات برائے 2024ء کے سائنس پری میڈیکل، پری انجینئرنگ، سائنس جنرل، ہوم اکنامکس، کامرس پرائیویٹ اور آرٹس پرائیویٹ گروپس کے نتائج پر طلبہ کے تحفظات دور کرنے کیلئے سینئر پروفیسرزپر مشتمل بارہ رکنی انکوائری کمیٹی قائم کردی ہے۔ انکوائری کمیٹی میں سرکاری کالجز کے پرنسپلز سمیت تمام مضامین کے ہیڈ ایگزامنرز کو شامل کیا گیا ہے۔ انکوائری کمیٹی اسکروٹنی کیلئے جمع کروائے گئے پرچوں کی جانچ پڑتال کر کے طلباء کی شکایات درست یا غلط ہونے کا فیصلہ کرے گی۔کمیٹی اس کے ساتھ انٹرمیڈیٹ حصہ اول کے درج بالا گروپس کے امتحانی پرچوں میں سوالات کے عام فہم ہونے کا بھی جائزہ لے گی۔ انکوائری کمیٹی تمام کیسوں کا انفرادی طورپر جائزہ لینے کے بعد اکیس دن میں اپنی رپورٹ اور سفارشات چیئرمین انٹربورڈ کراچی کو پیش کرے گی۔
نمبر: بی آئی ای/پی آر/008/ 2025 تاریخ: 05 جنوری 2025ء
پریس ریلیز
اعلیٰ ثانوی تعلیمی بورڈ کراچی نے چیئرمین سید شرف علی شاہ کی ہدایت پر طلبہ کی سہولت اور ان پر مالی بوجھ کم کرنے کیلئے انٹرمیڈیٹ حصہ اول کے سالانہ امتحانات برائے 2024ء کے سائنس پری میڈیکل، پری انجینئرنگ، سائنس جنرل، ہوم اکنامکس، کامرس پرائیویٹ اور آرٹس پرائیویٹ گروپس کے نتائج سے غیرمطمئن طلبہ کیلئے پرچوں کی اسکروٹنی فیس پچاس فیصد کم کردی ہے۔ طلبہ اس سے پہلے اسکروٹنی کیلئے فی پرچہ ایک ہزار روپے فیس جمع کرواتے تھے جسے کم کر کے 500 روپے کردیا گیا ہے، پچاس فیصد کم فیس کا اطلاق صرف انٹرمیڈیٹ حصہ اول کے سالانہ امتحانات برائے 2024ء کے درج بالا گروپس کے پرچوں کی اسکروٹنی پر ہوگا۔ اسکروٹنی فارم بروز پیر 3 فروری 2025ء تک وصول کیے جائیں گے۔ طلباء اسکروٹنی فارم اور فیس واؤچر انٹربورڈ کی ویب سائٹ www.biek.edu.pk سے ڈاؤن لوڈ کرسکتے ہیں۔ چیئرمین انٹربورڈ کراچی سید شرف علی شاہ کی ہدایت پر طلبہ کی آسانی کیلئے انٹربورڈ میں واقع سہولت مرکز پر خصوصی کاؤنٹر قائم کردیئے گئے ہیں جہاں طلبہ اپنے اسکروٹنی فارم اور فیس جمع کروائیں گے۔ انٹربورڈ کراچی نے طلباء کی مشکلات کے پیش نظر کراچی میں UBLکی تمام برانچوں میں فیس جمع کروانے کی سہولت بھی متعارف کروائی ہوئی ہے، طلباء اسکروٹنی فارم اور فیس واؤچر انٹربورڈ کی ویب سائٹ www.biek.edu.pk سے ڈاؤن لوڈ کر کے UBL کی کسی بھی برانچ میں اکاؤنٹ نمبر UBL-CMA-252536591 میں فی پرچہ 500 روپے فیس جمع کرواسکتے ہیں جبکہ جمع کرائی گئی فیس کا واؤچر اور اپنا فارم بروز پیر3 فروری سے قبل سہولت مرکز میں قائم خصوصی کاؤنٹرز پر جمع کروانا ہوگا۔
