پنجاب میں گنے کی کرشنگ کی 15نومبر کی حکومت ڈیڈلائن پر صرف 5 شوگر ملز نے عملدرآمد کیا۔
ذرائع کے مطابق 41 میں سے 36 شوگر ملوں نے صوبائی حکومت کے احکامات ہوا میں اڑا دیے ہیں۔
پنجاب حکومت نے شوگر ملوں کو 15 نومبر سے کرشنگ شروع کرنے کی ڈیڈ لائن دی تھی ، جس پر عمل درآمد نہ ہونے سے چینی کی قیمت میں 3 سے 4 روپے فی کلو مزید اضافے کا خدشہ ہے۔
مارکیٹ ذرائع کے مطابق پنجاب کے مختلف شہروں میں چینی کی قیمت 200 روپے سے215 روپے تک پہنچ چکی ہے۔
کین کمشنر نے حکومتی ڈیڈلائن پر کرشنگ کا آغاز نہ کرنے والی شوگر ملز کے خلاف کل سے کارروائی کا اعلان کیا ہے، جن ملوں نے کرشنگ شروع نہیں کی ، ان کے خلاف کارروائی کی جائے گی ۔
چیئرمین کسان اتحاد خالد باٹھ نے الزام عائد کیا کہ ملز مالکان تاخیر سے کرشنگ شروع کر کے کسانوں سے سستے داموں گنا خریدنے کی کوشش کریں گے۔
======================
بلوچستان، افیون، بھنگ کی 2 ہزار ایکڑ فصل تلف
بلوچستان، افیون، بھنگ کی 2 ہزار ایکڑ فصل تلف
بلوچستان میں افیون اور بھنگ کی 2 ہزار ایکڑ فصل تلف کردی گئی۔
قلعہ عبداللّٰہ میں ممنوعہ فصل کے خلاف ضلعی انتظامیہ اور نفاذ قانون کے اداروں نے مشترکہ آپریشن کیا۔
ڈپٹی کمشنر منور حسین مگسی کے مطابق کارروائی میں افیون اور بھنگ کی 2 ہزار ایکڑ فصل تلف کی گئی ہے۔
ڈپٹی کمشنر نے مزید کہا کہ قلعہ عبداللّٰہ کی تحصیل گلستان میں منشیات بنانے والی فیکٹریوں کے خلاف کارروائی کی گئی۔
منور حسین مگسی نے یہ بھی کہا کہ نورک سلیمان خیل میں آئس اور چرس تیار کرنے والی21 فیکٹریوں کو آگ لگا دی گئی جبکہ کارخانے چلانے والوں کی رہائش گاہوں کو گرا دیا گیا۔
