اردن کے شاہ عبداللّٰہ پاکستان کے 2 روزہ دورے پر اسلام آباد پہنچ گئے، صدر آصف زرداری، وزیر اعظم شہباز شریف نے ہوائی اڈے پر شاہ عبداللّٰہ کا استقبال کیا۔
شاہ عبداللّٰہ دوم کو وزیرِ اعظم ہاؤس میں گارڈ آف آنر پیش کیا گیا، پاکستانی فضائی حدود میں آمد پر پاک فضائیہ کے طیاروں نے شاہی طیارے کو حفاظتی حصار فراہم کیا۔
صدرِ مملکت آصف علی زرداری اور وزیراعظم شہباز شریف نے نور خان ایئر بیس پہنچنے پر ان کا استقبال کیا، وفاقی وزراء، خاتون اوّل بی بی آصفہ بھٹو زرداری اور چیئرمین پی پی پی بلاول بھٹو زرداری بھی اس موقع پر موجود تھے۔
آصف زرداری کا کہنا ہے کہ شاہ عبداللّٰہ دوم کا دورہ دوطرفہ تعلقات کو نئی اسٹریٹجک جہت دے گا، پاکستان اور اردن کے تعلقات تاریخی برادری، باہمی اعتماد اور مشترکہ اقدار کی بنیاد پر قائم ہیں۔
دفتر خارجہ کا کہنا ہے کہ دورے سے پاکستان اردن تعلقات کی اسٹریٹجک سمت مزید مضبوط ہوگی، شاہ عبداللّٰہ دوم صدر اور وزیرِ اعظم سے ملاقاتیں کریں گے۔
ترجمان دفتر خارجہ کا کہنا ہے کہ ایوان صدر میں شاہ عبداللّٰہ دوم کو پاکستان کا اعلیٰ ترین سول ایوارڈ دیا جائے گا۔
اعلامیے کے مطابق شاہ عبداللّٰہ کی شہباز شریف کے ساتھ وزیرِ اعظم ہاؤس میں دو طرفہ ملاقات ہوگی، دونوں رہنماؤں کے درمیان وفود کی سطح پر بھی ملاقات ہوگی۔
شاہ عبداللّٰہ دوم کا دورہ پاکستان اور اردن کے دیرینہ تعلقات کو مزید مستحکم کرے گا، دورہ دونوں برادر ممالک کے درمیان دوطرفہ تعاون کے دائرہ کار کو وسعت دینے میں معاون ثابت ہوگا۔
==============================
صوبہ خیبرپختونخواہ کے اضلاع بنوں اور لکی مروت میں پولیس اور محکمہ انسداد دہشت گردی کے مشترکہ آپریشن میں 5 خوارج مارے گئے۔ میڈیا رپورٹس کے مطابق تختی خیل کے سرحدی علاقے میں فتنۃ الخوارج کی موجودگی کی اطلاع پر ضلعی پولیس اور سی ٹی ڈی نے مشترکہ طور پر ایک اہم اور فیصلہ کن آپریشن کیا، ڈی آئی جی بنوں سجاد خان نے کی قیادت میں ہونے والے آپریشن کے دوران فائرنگ کے تبادلے میں فتنۃ الخوراج کے 5 دہشت گرد ہلاک ہوگئے، آپریشن میں تمام پولیس اہلکار محفوظ رہے۔
بتایا گیا ہے کہ یہ آپریشن ریجنل پولیس افسر بنوں سجاد خان کی نگرانی میں ہوا، ان کا کہنا ہے کہ خیبرپختونخواہ پولیس کے جوان امن و امان کے قیام اور عوام کے تحفظ کے لیے ہر دم تیار ہیں اور یہ کارروائیاں اسی عزم کا عملی ثبوت ہیں، آپریشن کے دوران عوام کی بھرپور امداد اور تعاون پولیس کو حاصل رہا، علاقہ مکینوں نے پولیس کے شانہ بشانہ کھڑے ہو کر مشکوک سرگرمیوں سے متعلق مسلسل معلومات فراہم کیں جس سے کارروائی کو کامیاب بنانے میں بڑی مدد ملی۔
آئی جی پی خیبرپختونخواہ ذوالفقار حمید نے بنوں اور لکی مروت پولیس کی بروقت اور مؤثر کارروائی کو سراہتے ہوئے کہا کہ خوارج کے خاتمے کے لیے ایسی کامیاب کارروائیاں علاقے میں دیرپا امن کو یقینی بنائیں گی، خیبرپختونخواہ پولیس کی جانب سے اس طرح کی کارروائیاں جاری رہیں گی، جس کے ذریعے دہشت گردوں کو کہیں بھی محفوظ پناہ گاہ نہیں ملنے دی جائے گی اور مشترکہ آپریشن امن کے استحکام کے لیے جاری رہے گا۔
