مور خہ15 نومبر 2025
صوبائی وزیر ایکسائز سندھ مکیش کمار چاولہ کی ہدایت پر صوبے بھر میں منشیات فروشوں و اسمگلروں کے خلاف کاروائیاں جاری ہیں
محکمہ نارکوٹس کنٹرول سندھ روہڑی سرکل کی اے ای ٹی او قمرالدین سیال کی ٹیم کے ہمراہ سینٹرل جیل روڈ سکھر پر بڑی کاروائی، ریو گاڑی سے 100 کلوگرام اعلی کوالٹی کی چرس برآمد
ملزمان محکمہ کسٹمز کی جعلی نمبر پلیٹ اور وردی کا استعمال کرکے منشیات اسمگل کرنے کی کوشش کررہے تھے، ترجمان محکمہ ایکسائز سندھ
کراچی 15نومبر ۔صوبائی وزیر ایکسائز، ٹیکسیشن و نارکوٹکس کنٹرول سندھ مکیش کمار چاولہ کی ہدایت پر صوبے بھر میں منشیات فروشوں و اسمگلروں کے خلاف کاروائیاں جاری ہیں۔ محکمہ نارکوٹس کنٹرول سندھ روہڑی سرکل کی ٹیم نے اے ای ٹی او قمرالدین سیال کی سربراہی میں خفیہ اطلاع پر سینٹرل جیل روڈ سکھر پر کاروائی کرتے ہوئے ریو گاڑی سے کروڑوں روپے مالیت کی 100 کلوگرام اعلی کوالٹی کی چرس برآمد کرلی۔ چھاپہ مار ٹیم نے کاروائی کے دوران ایک خاتون مسمات نازیہ سمیت 4 ملزمان شیر محمد، شاہد اور حاجی محمد کو گرفتار کرکے مقدمہ درج کرلیا ہے۔ ترجمان محکمہ ایکسائز سندھ کے مطابق ملزمان محکمہ کسٹمز کی جعلی نمبر پلیٹ اور وردی کا استعمال کرکے منشیات اسمگل کرنے کی کوشش کررہے تھے جسے ناکام بنادیا گیا۔ دوسری جانب سے صوبائی وزیر ایکسائز سندھ مکیش کمار چاولہ نے کامیاب کاروائی پر روہڑی سرکل کی ٹیم کو مبارکباد دیتے ہوئے منشیات فروشوں و اسمگلروں کے خلاف بلاتفریق بھرپور کاروائیاں جاری رکھنے کی ہدایت کی ہے۔
ہینڈ آؤٹ نمبر 1281۔۔۔ایس اے بی
ڈائریکٹوریٹ آف پریس انفارمیشن
محکمہ اطلاعات حکومت سندھ فون۔99204401
کراچی
مور خہ15 نومبر 2025
کراچی 15نومبر ۔ سندھ کے سینئر وزیر شرجیل انعام میمن نے کراچی کی خواتین کے لیے خوشخبری دیتے ہوئے اعلان کیا ہے کہ شہر میں پنک بس سروس کا نیا روٹ 17 نومبر 2025 سے فعال ہوگا۔ یہ روٹ عبداللہ چوک سے نمائش تک مقرر کیا گیا ہے اور ابتدا میں خواتین کے لیے تین مخصوص اوقات رکھے گئے ہیں، جن میں صبح 8 سے 9 بجے، دوپہر 1 سے 2 بجے اور شام 5 سے 7 بجے سفر کی سہولت دستیاب ہوگی۔
ایک بیان میں سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ یہ سروس مکمل طور پر خواتین کے لیے مختص ہے، جس میں آرام، تحفظ اور بہتر انتظامات کو ترجیح دی گئی ہے۔
انہوں نے کہا کہ کراچی جیسے بڑے شہر میں خواتین کو روزانہ سفر کے دوران متعدد مشکلات کا سامنا رہتا ہے اور یہ اقدام ان کے بوجھ کو کم کرنے میں مدد دے گا۔
ان کا کہنا تھا کہ حکومت سندھ کا مقصد ہے کہ خواتین اپنی تعلیم، ملازمت اور ذاتی امور اعتماد کے ساتھ انجام دے سکیں۔ بسوں میں سیکیورٹی، ٹریکنگ سسٹم اور تربیت یافتہ عملہ موجود ہوگا جبکہ مستقبل میں اس سروس کو مزید علاقوں تک بڑھانے کا بھی ارادہ ہے۔
سینئر وزیر شرجیل انعام میمن نے مزید کہا کہ یہ فیصلہ خواتین کے لیے زیادہ محفوظ شہری ماحول کی جانب ایک اہم قدم ہے اور سندھ حکومت آئندہ بھی ان کے لیے سہولیات بڑھانے کے عملی اقدامات جاری رکھے گی۔
ہینڈ آؤٹ نمبر 1282۔۔۔
ڈائریکٹوریٹ آف پریس انفارمیشن
محکمہ اطلاعات حکومت سندھ فون۔99204401
کراچی
مور خہ15 نومبر 2025
کراچی 15نومبر ۔ڈائریکٹوریٹ جنرل ہیلتھ سندھ نے صوبے میں ڈینگی سے متعلق یومیہ رپورٹ جاری کر دی ہے۔ رپورٹ کے مطابق گزشتہ 24 گھنٹوں کے دوران سندھ کے سرکاری اسپتالوں میں ڈینگی کے مزید 113 نئے مریض داخل ہوئے۔
محکمہ صحت کے مطابق کراچی کے سرکاری اسپتالوں میں 44 جبکہ حیدرآباد میں 35 اور سندھ کے دیگر اضلاع سے 34 نئے ڈینگی کیسز رپورٹ ہوئے۔ صوبے بھر میں اس وقت ڈینگی کے باعث سرکاری اسپتالوں میں 241 مریض زیر علاج ہیں۔
رپورٹ میں بتایا گیا ہے کہ نجی اسپتالوں میں 57 نئے ڈینگی کیسز رپورٹ کیے گئے ہیں۔
ڈینگی کے باعث آج مزید 3 افراد جاں بحق ہوئے، جن میں سے ایک کا تعلق کراچی اور دو کا تعلق حیدرآباد سے ہے۔
صوبے بھر کی ڈینگی رجسٹرڈ لیبارٹریز میں گزشتہ 24 گھنٹوں کے دوران 5229 نمونوں کی ٹیسٹنگ کی گئی، جن میں سے 774 افراد ڈینگی وائرس سے متاثر پائے گئے۔
رپورٹ کے مطابق 191 مریض علاج کے بعد صحت یاب ہو کر گھروں کو روانہ ہو چکے ہیں۔
محکمہ صحت نے عوام سے اپیل کی ہے کہ ڈینگی سے بچاؤ کے لیے احتیاطی تدابیر اختیار کریں اور صفائی ستھرائی کا خاص خیال رکھیں تاکہ ڈینگی مچھر کی افزائش کو روکا جاسکے۔
ہینڈ آؤٹ نمبر 1283۔۔۔
