اسلام آباد،اردن کے فرمانروا شاہ عبداللہ دوم اعلیٰ سطحی اردنی وفد کے ہمراہ پاکستان پہنچ گئے، جہاں صدرمملکت آصف علی زرداری اور وزیراعظم شہباز شریف نے ایئرپورٹ پر پرتپاک استقبال کیا۔
شاہ عبداللہ دوم کا یہ اہم دورہ پاکستان اور اردن کے درمیان دیرینہ برادرانہ تعلقات کی مضبوطی اور مختلف شعبوں میں تعاون کے مزید فروغ کی علامت قراردیا جا رہا ہے۔
حکومتی حکام کے مطابق شاہ عبداللہ دوم کے دورۂ پاکستان میں سیاسی، اقتصادی، دفاعی اور ثقافتی تعاون کے نئے امکانات پر جامع گفتگو متوقع ہے۔
نواز شریف ایک بار پھر لندن روانہ
دورے کے دوران دونوں ممالک کی قیادت باہمی شراکت داری کو مزید وسعت دینے اور مشرقِ وسطیٰ و خطے کی مجموعی صورتحال پر بھی تبادلہ خیال کرے گی۔
سرکاری شیڈول کے مطابق کچھ دیر بعد وزیراعظم ہاؤس میں شاہ عبداللہ دوم کو روایتی گارڈ آف آنر پیش کیا جائے گا، اس کے بعد وزیراعظم شہباز شریف اور شاہ عبداللہ دوم کی ون آن ون ملاقات ہوگی۔
جس میں دو طرفہ تعلقات کو نئے مرحلے میں داخل کرنے کے اقدامات پر بات چیت کی جائے گی، بعد ازاں پاکستان اور اردن کے درمیان وفود کی سطح پر باضابطہ مذاکرات بھی ہوں گے۔
حکام کا کہنا ہے کہ شاہ عبداللہ دوم کا یہ دورہ دونوں ممالک کے درمیان تعاون کے نئے در کھولنے اورتعلقات کو مزید مضبوط بنانے میں اہم پیشرفت ثابت ہوگا۔
