اسلام آباد: نائب وزیراعظم و وزیرِ خارجہ سینیٹر محمد اسحاق ڈار سے امریکی ناظم الامور نٹیلی بیکر نے آج وزارتِ خارجہ میں ملاقات کی۔ ملاقات میں پا ک امریکا دوطرفہ تعلقات، اقتصادی تعاون اور خطے کی صورتحال پر تبادلۂ خیال کیا گیا۔
نائب وزیراعظم نے آئی ٹی اور کریٹیکل منرلز کے شعبوں میں سرمایہ کاری بڑھانے کی ضرورت پر زور دیتے ہوئے پاکستان میں امریکی کمپنیوں کی بڑھتی دلچسپی کا خیرمقدم کیا۔ انہوں نے خصوصاً ہری پور میں گوگل کروم اسمبلی لائن کے قیام کو معاشی تعاون کی مثبت مثال قرار دیا۔
دونوں جانب سے علاقائی اور عالمی معاملات پر بھی گفتگو ہوئی، جبکہ غزہ میں جاری امن کوششوں پر پیش رفت کا جائزہ لیا گیا۔ فریقین نے مشترکہ مقاصد کے لیے رابطوں کے تسلسل پر اتفاق کیا۔
============================
اردن کے شاہ عبداللہ دوم دو روزہ سرکاری دورے پر کل پاکستان پہنچیں گے
یہ دورہ پاکستان–اردن تعلقات کی اسٹریٹجک سمت کو مزید مضبوط کرے گا اور انہیں ایک بلند تر سطح پر لے جائے گا، جس میں سیاسی، اقتصادی اور ثقافتی شعبوں میں جامع اور وسیع البنیاد شراکت داری شامل ہوگی، دفتر خارجہ
========================
نائب وزیراعظم کی زیرصدارت اعلیٰ سطحی بین الوزارتی اجلاس ، دوست ممالک کے ساتھ سرمایہ کاری کے مواقع پر زور
اسلام آباد:نائب وزیراعظم و وزیرِخارجہ سینیٹر محمد اسحاق ڈار نے دوست ممالک بشمول آذربائیجان کے ساتھ سرمایہ کاری کے منصوبوں اور تجاویز پر پیش رفت کا جائزہ لینے کے لیے اعلیٰ سطحی بین الوزارتی اجلاس کی صدارت کی۔
اجلاس میں معاون خصوصی طارق باجوہ، وزارتِ خارجہ، وزارتِ تجارت، وزارتِ مواصلات، وزارتِ انسانی وسائل کے ایڈیشنل سیکرٹریز، آذربائیجان میں پاکستان کے سفیر اور متعلقہ وزارتوں کے دیگر سینئر اہلکار شریک ہوئے۔
اجلاس میں بنیادی ڈھانچے، توانائی، پٹرولیم، تجارت اور آئی ٹی سروسز میں بیرونی سرمایہ کاری کے مواقع پر توجہ مرکوز کی گئی۔ نائب وزیراعظم نے کہا کہ پاکستان کے اقتصادی اور سرمایہ کاری تعلقات کو مضبوط بنانا، خاص طور پر آذربائیجان جیسے شراکت دار ممالک کے ساتھ، حکومت کی اولین ترجیحات میں شامل ہے اور ان منصوبوں کو پائیدار ترقی اور خوشحالی میں تبدیل کرنے کے لیے بھرپور اقدامات کیے جائیں گے۔
