خورشید شاہ 27 ویں آئینی ترمیم پر ووٹ دینےکیلئے وھیل چیئر پر پارلیمنٹ پہنچ گئے
اسلام آباد: پاکستان پیپلز پارٹی کے رہنما سید خورشید شاہ 27 ویں آئینی ترمیم پر ووٹ دینے کے لیے وھیل چیئر پر پارلیمنٹ پہنچ گئے۔
مسلم لیگ ن کے صدر اور سابق وزیر اعظم نواز شریف اپنی نشست سے اٹھ کر خورشید شاہ کے پاس گئے اور ان کا حال احوال دریافت کیا۔
ان کے علاوہ وزیراعظم شہباز شریف اور نائب وزیراعظم اسحاق ڈار نے بھی خورشید کے پاس جا کر انہیں خوش آمدید کہا اور ان کی خیریت دریافت کی۔
خیال رہے کہ خورشید شاہ گزشتہ کچھ ماہ سے علیل ہیں۔ 2 ماہ قبل انہیں این آئی سی وی ڈی سکھر میں داخل کیا گیا تھا جس کے بعد انہیں مزید علاج کے لیے کراچی منتقل کیا گیا تھا۔
انہیں وزیراعلیٰ سندھ مراد علی شاہ کی خصوصی ہدایت پر حکومت سندھ کے خصوصی طیارے کے ذریعے کراچی بھیجا گیا تھا۔
=============================
خدارا سارے اختیارات لے لیں، 130 شہروں میں ظہران ممدانی دے دیں: فاروق ستار
اسلام آباد: ایم کیو ایم پاکستان کے رہنما فاروق ستار کا کہنا ہےکہ خدارا سارے اختیارات لے لیں، 130 شہروں میں ظہران ممدانی دے دیں۔
قومی اسمبلی اجلاس سے خطاب کرتے ہوئے فاروق ستار کا کہنا تھا کہ کبھی کہتے ہیں ہم نے اختیارات منتقل کر دیے، ہم اپنی جمہوریت کو مضبوط نہیں کرسکتے، بلدیاتی نظام کو لاگو کریں۔
فاروق ستار نے وزیراعظم، وزیرقانون اور فیلڈ مارشل سے مطالبہ کیا کہ خدارا سارے اختیارات لے لیں، 130 شہروں میں ظہران ممدانی دے دیں۔
فاروق ستار کا کہنا تھا کہ کوئی بھی آئینی ترمیم کے پیچھے وقت اور حالات کے تقاضے ہوتے ہیں، عوام کی فلاح پر کبھی توجہ نہیں رہی، آمرانہ ادوار میں بلدیاتی نظام آتا تھا،جہاں سیاسی جماعتیں بھی اپنا حصہ لینے کے لیے آگے آتی رہی ہیں، دوتہائی حکومت کے پاس ہے تو 27 ویں ترمیم کی منظوری کےبعد بھی ذمہ داری آتی ہے۔
ان کا کہنا تھا کہ پاکستان نے دفاعی، خارجی شعبوں میں صلاحیت کا مظاہرہ کیا، اب پاکستان کو معاشی طور پر مستحکم ہونا ہے، دنیا کے ساتھ قدم سے قدم ملا کر چلنا ہوگا۔
=========================
اسلام آباد: چیئرمین پیپلز پارٹی بلاول بھٹو زرداری نے کہا ہے کہ فیلڈ مارشل کے عہدے کو آئینی تحفظ دینے جا رہے ہیں۔ اور کسی کا باپ بھی 18ویں ترمیم ختم نہیں کر سکتا۔
چیئرمین پیپلز پارٹی بلاول بھٹو زرداری نے قومی اسمبلی میں اظہار خیال کرتے ہوئے کہا کہ 26ویں ترمیم پر ووٹ دینے سے پہلے مولانا فضل الرحمان نے تحریک انصاف سے اجازت لی۔ اور ہم فیلڈ مارشل کے عہدے کو آئینی تحفظ دلوانے جا رہے ہیں۔
انہوں نے کہا کہ میثاق جمہوریت پر صرف ن لیگ اور پیپلز پارٹی نہیں بلکہ تمام جماعتوں نے اتفاق کیا۔ اور کسی کا باپ بھی چاہے تو 18ویں ترمیم کو ختم نہیں کرسکتا۔ ہم نے 18ویں ترمیم کے وقت فیصلہ کیا تھا کہ آئینی عدالت بنائیں گے۔
بلاول بھٹو زرداری نے کہا کہ پاک افواج کو اس وقت دنیا بھر میں سراہا جا رہا ہے۔ اور پاک فوج نے مودی کو دنیا کے سامنے منہ دکھانے کے قابل نہیں چھوڑا۔ پاکستان سے شکست کے بعد بھارت افغان حکام کی میزبانی کر رہا ہے۔
انہوں نے کہا کہ اپوزیشن جماعتوں کو بھی کہتے ہیں 27ویں ترمیم کی حمایت کریں۔ اپوزیشن کا کام صرف اپنے لیڈر کے لیے رونا نہیں۔ اور اپوزیشن صرف اپنے لیڈر کی رہائی کے لیے ایوان میں نہ آئے۔ اپوزیشن کو قانون سازی اور دیگر اقدامات میں ساتھ دینا چاہیے۔
یہ بھی پڑھیں: اسلام آباد ہائیکورٹ نے ججز کی تقرری کیلئے ایگزیکٹو کی عدلیہ سے مشاورت لازمی قرار دیدی
چیئرمین پیپلز پارٹی نے کہا کہ پاکستان کی بہادر قوم نے پہلے بھی دہشت گردوں کو شکست دی۔ اور اپوزیشن کو بھی عوام کے سامنے جوابدہ ہونا پڑے گا۔
