بنوں: ضلع بنوں میں ایک روزہ ٹیلنٹ میلہ اختتام پذیر ہوگیا جس میں ڈویژنل اور ضلعی انتظامیہ کے اعلیٰ افسران سمیت شہریوں کی بڑی تعداد نے شرکت کی۔ میلے میں 150 سے زائد اسٹالز لگائے گئے جن میں طلباء، ہنر مندوں اور نوجوانوں نے اپنی صلاحیتوں کا بھرپور مظاہرہ کیا۔
ٹیلنٹ میلے میں علاقے کی ثقافت اور روایتی دستکاری کی جھلک نمایاں رہی، جبکہ خواتین کے تیار کردہ کپڑوں، زیورات اور آرٹ ورک کو شرکاء نے خاصی پذیرائی بخشی۔ اس موقع پر ہنرمندوں، خواتین اور ہنڈی کرافٹ بنانے والوں کی حوصلہ افزائی کے لیے نقد انعامات اور تعریفی اسناد بھی تقسیم کی گئیں۔
میلے کے شرکاء نے ضلعی انتظامیہ کی اس کاوش کو خوش آئند قرار دیتے ہوئے کہا کہ ایسی مثبت اور تعمیری سرگرمیوں کے انعقاد سے علاقے کے نوجوانوں کو اپنی صلاحیتوں کے اظہار اور ترقی کے نئے مواقع میسر آئیں گے۔
