کے الیکٹرک کے سی ای او سید مونس عبداللّٰہ کو ہٹانے کی کوشش ناکام
06 نومبر ، 2025
اسلام آباد(خالد مصطفیٰ) کے-الیکٹرک کے سی ای او سید مونس عبداللہ علوی کو ہٹانے کی کوشش بدھ کو اس وقت ناکام ہوگئی جب کمپنی کے اہم نجی شیئرہولڈرز نے بورڈ آف ڈائریکٹرز کے اجلاس میں شرکت سے انکار کردیا، جس کے باعث اجلاس کورم کی کمی کے باعث منسوخ ہوگیا۔اجلاس کا باضابطہ ایجنڈا ’’نان فنانشل امور‘‘ تھا، مگر درحقیقت مقصد سی ای او کی برطرفی تھا۔ حکومتی نامزد ارکان شریک ہوئے لیکن سعودی عرب کی الجمیع گروپ اور کویت کی ڈینہم انویسٹمنٹس جیسے غیر ملکی سرمایہ کار، جو اکثریتی حصص کے مالک ہیں، غیر حاضر رہے۔ذرائع کے مطابق غیر ملکی سرمایہ کاروں نے اس اقدام کو ’’معاندانہ‘‘ قرار دیا، خصوصاً ایسے وقت میں جب وہ حکومت پاکستان کے ساتھ 2 ارب ڈالر کے تنازعے پر مذاکرات میں مصروف ہیں۔
=======================
ہوٹل مالکان کی شہر کے داخلی و خارجی راستے مکمل بند کرنے کی دھمکی
06 نومبر ، 2025FacebookTwitterWhatsapp
کراچی (اسٹاف رپورٹر ) آل سندھ ہوٹل اینڈ ریسٹورنٹ گرینڈ ایسوسی ایشن کے چیئرمین نورالحق نے کمشنر کراچی کو کھلی دھمکی دی ہے کہ تجاوزات کی آڑ میں بند کئے گئے ہوٹلوں کو آئندہ 24 گھنٹوں میں غیر مشروط طور پر نہ کھولا گیا تو شہر کے داخلی و خارجی راستے مکمل طور پر بند کر دیں گے ، ان خیالات انہوں نے بدھ کی شام کراچی پریس کلب کے باہر احتجاجی مظاہرے سے خطاب کرتے ہوئے کیا، قبل ازیں انہوں نے ذمہ داران کے ہمراہ کراچی پریس کلب میں پریس کانفرنس سے بھی خطاب کیا، کراچی پریس کلب کے باہر ہوٹل مالکان کا ایک جم غفیر امڈ آیا جس کی وجہ سے کلب کے دونوں ٹریکس ٹریفک کی آمد و رفت بند گئے، نور الحق نے وزیر اعلیٰ ، گورنر سندھ ، چیف سیکریٹری اور کمشنر کراچی سے مطالبہ کیا کہ بند کیئے گئے ہوٹل غیر مشروط کھول دیئے جائیں، اگر ہمارے جائز مطالبات منظور نہ ہوئے تو نیشنل ہائی وے ، سپر ہائی وے، حب روڈ دھرنا دے کر بند کر دینگے ، مظاہرین کے ساتھ جمعیت علمائے اسلام ف کراچی کے رہنماء مولانا غیاث نے اظہارِ یکجہتی کیا ۔
