طالبہ کی 4 اساتذہ کیخلاف ہراسانی کی شکایت پر انکوائری رپورٹ مسترد
صوبائی محتسب نے پی ایچ ڈی طالبہ کی 4 اساتذہ کے خلاف ہراسانی کی شکایت پر انکوائری رپورٹ مسترد کردی۔
سندھ مدرسۃ الاسلام یونیورسٹی (ایس ایم آئی یو) کو 5 دن میں شفاف اور غیر جانبدار نئی کمیٹی تشکیل دینے کا حکم دے دیا اور کہا کہ فیصلے پر عمل نہ کرنے پر توہین عدالت کی کارروائی ہو گی۔
جسٹس (ر) شاہنواز طارق نے ریمارکس دیے کہ یونیورسٹی کی انکوائری کمیٹی نے 3 اساتذہ کے نام خارج کر کے ایک ملزم کے خلاف کارروائی کی، کمیٹی کو کسی ملزم کو کارروائی سے خارج کرنے کا اختیار نہیں ۔
قانون کے مطابق انکوائری کمیٹی میں ایک خاتون رکن کے ساتھ کم از کم 3 ارکان ہونے چاہئیں، نئی کمیٹی شکایت کنندہ طالبہ اورملزمان کےتحریری بیان ریکارڈ کرے گی۔
===============================
داؤد یونیورسٹی کی پہلی اعزازی پی ایچ ڈی کی سند ناصر شاہ کے نام
سید محمد عسکری
داؤد یونیورسٹی کی پہلی اعزازی پی ایچ ڈی کی سند ناصر شاہ کے نام
داؤد یونیورسٹی آف انجینئرنگ اینڈ ٹیکنالوجی کی 22واں سنڈیکیٹ اجلاس ہفتہ کو یونیورسٹی کے کانفرنس روم میں منعقد ہوا جس کی صدارت وائس چانسلر انجینئر پروفیسر ڈاکٹر ثمرین حسین نے کی۔
اجلاس میں ارکان نے متفقہ طور پر سندھ کے سینئر وزیر سید ناصر حسین شاہ کو صوبہ سندھ میں تعلیم کے فروغ اور فلاح و بہبود کے شعبے میں بے شمار خدمات کے اعتراف میں داؤد یونیورسٹی آف انجینئرنگ اینڈ ٹیکنالوجی کی تاریخ میں پی ایچ ڈی کی پہلی اعزازی ڈگری دینے کی سفارش کی۔
سنڈیکیٹ کی سفارشات اور گزارشات جامعہ داؤد انجینئرنگ کے چانسلر اور گورنر سندھ کامران خان ٹیسوری کو بھیجی جائیں گی جس کی منظوری کے بعد آئندہ آنے والے کانووکیشن میں یہ ڈگری سینئر صوبائی وزیر سید ناصر حسین شاہ کو تفویض کی جائے گی۔
علاوہ ازیں سنڈیکیٹ نے فنانس اینڈ پلاننگ کمیٹی کی سفارشات پر مالیاتی امور بشمول مالی سال 2025-26ء کی پہلی سہ ماہی کے اخراجات کی رپورٹ کی منظوری بھی دی۔
اجلاس کو بتایا گیا کہ وائس چانسلر انجینئر پروفیسر ڈاکٹر ثمرین حسین کے اعلیٰ انتظامی و مالیاتی فیصلوں کی بدولت رواں مالی سال کی پہلی سہ ماہی میں 245 ملین روپے کی بچت کی گئی ہے اور اس عزم کا اعادہ بھی کیا گیا ہے کہ بچت و کفایت شعاری کے اقدامات کو جاری رکھا جائے گا۔
سنڈیکٹ نے 2024-25ء کے آڈٹ شدہ مالیاتی گوشوراہ کی بھی منظوری دی۔
اجلاس کے اختتام پر سنڈیکیٹ کے اراکین نے وائس چانسلر انجینئر پروفیسر ڈاکٹر ثمرین حسین (ستارہ امتیاز ، تمغہ امتیاز) کی مؤثر قیادت، شفاف طرزِ حکمرانی اور جامعہ میں علمی و انتظامی ترقی کے اقدامات کو سراہا۔
https://www.youtube.com/watch?v=hQrgXHyloa0
https://www.youtube.com/watch?v=3TYKCHHyWLE
https://www.youtube.com/watch?v=Og1oCCN140c
https://www.youtube.com/watch?v=WQhlhKgdnoc
https://www.youtube.com/watch?v=zF992qgrdRg
