اسلام آباد:صدر مملکت آصف علی زرداری اور وزیرِ اعظم محمد شہباز شریف کے درمیان ایوانِ صدر میں ملاقات ہوئی ہے۔ ملاقات کے دوران قومی اہمیت کے امور،ملک کی موجودہ سیاسی و سیکیورٹی صورتِ حال،اور خطے کی حالیہ و عالمی پیش رفت پر تبادلہ خیال ہوا۔
وزیرِ اعظم نے صدرِ مملکت کو اپنے مصر اور ملائیشیا کے حالیہ دوروں میں بین الاقوامی رہنماؤں سے ملاقاتوں اور غزہ میں قیامِ امن کے لیے کی جانے والی کوششوں کے حوالے سے آگاہ کیا۔
صدرِ آصف علی زرداری اور وزیرِ اعظم محمد شہباز شریف نے ون آن ون ملاقات کی جس میں قومی ترجیحات اور حکومتی پالیسیوں پر تبادلہ خیال کیا۔ دونوں رہنماؤں قومی اہمیت کے معاملات پر سیاسی مشاورت کا سلسلہ جاری رکھنے پر بھی اتفاق کیا ۔
مشترکہ ملاقات میں وزیرِ اعظم کے ہمراہ نائب وزیرِ اعظم و وزیرِ خارجہ سینیٹر محمد اسحاق ڈار، وزیر برائے منصوبہ بندی و ترقی احسن اقبال وزیر برائے بین الصوبائی رابطہ و سیاسی امور رانا ثناء اللہ خان، وزیرِ داخلہ سینیٹر سید محسن نقوی، وزیرِ قانون و انصاف سینیٹر اعظم نذیر تارڑ، سینیٹر سلیم مانڈوی والا، سینیٹر شیری رحمٰن اور سید نیئر حسین بخاری بھی موجود تھے۔
